South Korea-a Busan khawpui tumhmunah Airbus thlawhna a kang a, a chuang mi 176 chu hmun himah thiar chhuah an ni tih kang thelh thuneituten an sawi.
Air Busan thlawhna pakhat hi an ram chhimchhak lam tumhmunah hian a ke a tleng a, kang zuiin mi palin hliam an tuar a, thi erawh an awm hriat a ni lo.
Hong Kong pan tur thlawhna hi a thlawh chhuah hnu lawkah a hnung lam atangin a kang tan a. Hun rei lo te chhunga thleng nghal kang thelhtute chuan pawi zawk a kan kai hmain an thelh nghal a ni.
Thla khat pawh la tling lovah khan South Korean leilunga thlawhna chhiatna lian ber a lo thleng tawh a, Jeju Air thlawhna chu an ram chhimthlanga Muan tumhmunah a tumnaah a chesual a, mi 179 an thi a, pahnih chauh an dam chhuak.
Air Busan thlawhna hi Gimhae International Airport-ah an ram hina Thawhlehni zan dar 10:26 (India-a tlai dar 6:56)-a kang tan niin Yonhap news agency chuan South Korea-a kang thelhtute sawi a tar lang.
Minute riat hnuah kang thelhtute an thleng nghal a. Thlalak darhah chuan tui hmanga thlawhna kang hluah hluah lai thelh tuma beih lai a lang.
Thlawhnaah hian passenger 169 leh thawktu pasarih an chuang a. A kan chhan hi chhui nghal mek a ni.
Air Busan hi thlawhna chuan man tlawm a ni a, Asiana Airlines hnuaia awm a ni.
Busan tumhmun hi an khawpui, Seoul atanga chhimchhak lam km 315 vela hlaa awm a ni.