Aizawl: State Day of Prayer Committee hmalaknain kumin Mizoram State Day (February 20)-ah ram pum huapa a huhova tawngtai rual buatsaih a ni leh dawn a. Kumin hian ram tihdam lehna ‘siam thar lehna’ hawi tur a nih avangin Fiji Challenge tih a ni dawn.
Nilaini khan Aizawl Press Club-ah State Day of Prayer Committee hruaitute chuan chanchinbumite kawmin State Day-a a huhova tawngtai rual an buatsaih tur chungchang an sawi fiah a. State Day of Prayer hi nikumah sual thupha chawina atana hman a ni a, kuminah chuan ‘I ram lo thleng rawh se’ tih chu hman a nih thu an sawi.
State Day of Prayer hi kumin hian nasa zawkin ram pum huapa district tin leh khaw tinah tawngtai inkhawmpui lian buatsaih turin ruahmanna kalpui mek a ni a, district tinah district bawrhsapte uapna hnuaiah District Level Committee din mek a nih thu an sawi a. Mizoramah Pathian ram a lo thlen ngei theih nan kohhran pawl hrang hrangten thukhat vuain Zoram mipuite thinlung hmunkhat pua tawngtaina nei ho turin an sawm.
Kumin State Day of Prayer hi AR Lammual-ah hman tum a ni a. He hunah hian main speaker atan Chief Minister Lalduhoma leh Frederick Lalrindika te ruat niin, nikum lam aia tawngtaina tam zawk hman tum a nih thu State day of Prayer Committee chuan an sawi a. Zaipawl Pui member 1,500 awmna din tura hmalak mek a nih thu leh, kohhran hrang hrang thalaite leh tawngtai mite-ah State Day of Prayer puala zan chanve tawngtai buatsaih tum a ni bawk.
State Day of Prayer 2025 buatsaih turah hian Mizoram Kohhran Hruaitute Committee (MKHC) leh Council of Churches in Mizoram (CCM) te pawh biakrawn tawh niin kohhran hrang hrangte inpumkhatna nen, hmun khatah thupui pakhat hmanga Pathian auin ramin Pathian malsawmna tluantling dawn theih a nih theih nan hmalak ho mek thu an sawi.
Political party hrang hrangte tan pawh hun siam tum a ni a, tawngtaipui an ngaihna lai theuh thawh tur a sawm an ni a. Minister, MLA leh sorkar hnathawk zawng zawngte pawh mipuiten an tawngtaisakna hun tur siam tum a nih thu an sawi bawk.