Zo Reunification Organisation (ZORO) buatsaihin nimin khan Free Movement Regime (FMR) hlih leh border fencing tum duh loh lantirna Aizawlah neih a ni a. He hunah hian FMR hlip a, kengkawh tura India sorkar thupek leh Mizoram sorkar thupek hal a ni.
He huna thusawitu ZORO Vice President Rohmingthanga Kawlni chuan, “Central sorkarin zalen taka kan unaute nena kan inkalpawh theih dan hlip a, a hlihna order a siam a, Christmas present niawm taka a rawn thawn hi keini ZORO chuan a lungchhiatthlak kan ti a, chumi ruala Mizoram sorkarin hmanhmawh taka hman theih tura a buaipui rum rum hi ZORO chuan kan hrethiam lo va, kan lungawi lo hle a ni,” a ti.
Thusawitu dang, ZORO General Secretary L. Ramdinliana Renthlei chuan FMR thiah leh ramri hung (border fencing) a lo rik tirh khan Zofate chuan an helh hle a. ZORO pawhin theihtawpin an dodal tih sawiin, “NGO hrang hrang leh political party pawhin an dodal a, Mizoram State Legislative Assembly session-ah pawh duh lohna resolution lungrual taka pass a ni. A lan danah chuan Zofa zawng zawngin kan duh lo vek a ni. Heti khawpa Zofaten kan duh lo chunga India sorkarin a tilui a nih chuan kan ramah eng harsatna pawh thleng se mawh kan phur dawn lo a ni,” tiin, FMR hlih leh border fencing hi ZORO chuan a dodal zel dawn thu leh na zawka hmala turin ruahmanna siam a ni dawn a, an hmalakna thlawp zel turin mipui zawng zawng a sawm.
ZORO-in FMR hlih leh ramri hung duh loh lantirnaah hian ZORO General Secretary Lalnunfela Chawngthu pawhin thu a sawi bakah MPCC aiawhin Joseph Lalhimpuia, GS; MNF aiawhin TJ. Lalnuntluanga, Ex-Minister leh ZPM aiawhin Ngursailova Sailo, PAC-in thu an sawi a ni.
FMR hlih leh border fencing tum duh loh lantirna hi Champhai, Serchhip, Lunglei, Kolasib, Mimbung, Vaphai leh Tengnopal, Manipur-ah te hman a ni bawk.