Tunhnai ni hnih khat vel kalta atang khan khawvawt a zual deuh niin a hriat a, a tehna lam atanga finfiahna nei chiah lo mah ila boruak chu a vawt zual deuh chiang tih a hriat theih.
Kumdang zawng aiin tun tum thlasik hi a vawt lo deuh niin a hriat a, boruak pawh a nuam tawk chho viau a, hun pui pawh boruak nuam tak hnuaiah kan hmang zo thei niin a lang.
Tun hnaitea khawvawt rawn zual nia lang hi kan fimkhur zualna tur bul tan nan hman ngei a tulin a hriat a, mitinin intih lum nan electric hmang heater leh meihawl lam chi thlengin kan hmang nasa tawhin, hei hi fimkhur taka kan hman thiam a tul hle.
Thlasik boruak zawh hian nipui khawlumin a rawn chhunzawm leh ngei dawn a, kangmei chhuah awlsam hun a ni chho tan leh tawh bawk nen tun hi kan fimkhur intan hun atan hmang thei ila a tha awm e.
Khawvawt leh khawlumte hi kan la tuar chho fo ang, chutiang huna kan buai lohna tura inzirtirna leh invenna hrang hrang hi kan tihchhuah chamchi a hun chho hle a. Tun atang hian inbuatsaihna leh inzirtirna lam nei nasain i bul tan teh ang u. Kan zavaia himna tur a ni si a.