Aizawl: Ministry of Labour & Employment buatsaih, India rama labour kaihhnawih thil chi hrang hrang sawihona leh inhrilhfiahna, ‘Meeting with State Labour Ministers and Secretaries on Labour issues’ chu Dr. Mansukh Mandaviya, Union Minister for Labour and Employment kaihhruaina hnuaiah Hotel Ashoka, New Delhi-ah tan a ni.
Ni hnih awh tur meeting-ah hian state leh union territory hrang hrang atanga labour minister, labour secretary leh senior official te telin Mizoram aiawhin Lalnghinglova Hmar, Minister of State leh John Tanpuia, Director, LESDE department te an tel.
Nimina session hnuhnung ber, ‘National Career Services (NCS) and Model Career Centre (MCC)’ chu union labour minister leh Mizoram Lalnghinglova Hmar ten an kaihhruai a ni.
Meeting-ah hian State leh UT hrang hrangin labour kaihhnawiha hmalakna an neihte an sawi ho a. Sawihona hrang hrang zingah labourer (organized leh unorganized) te hamthatna leh an him lehzualna tura ngaihtuah te, labourer te tana tangkai leh awmze nei zawka labour cess hman chungchang te, thalai hna zawng mekte tana tangkai tak National Career Services (NCS) leh Model Career Centre (MCC) tihchangtlun chungchang te a tel. Tun hnaia labour kaihnawih dan hrang hrang siam thatte sawiho nghal a ni bawk.