Uttar Pradesh-a Prayagraj khawpuia Hindu sakhaw punkhawmna lian, Maha Kumbh-ah Nilaini tuk khan innek buaina a thleng a, mi 15 vel thi awm tawhin mi 70 veln hliam an tuar bawk.
Punkhawmnaah hian Nilaini kha an ni pawimawh bik, Mauni Amavasya niin kum 144 hnua a vawi khat awmna a ni a, khaw var hma atang tawhin mi tam tak inbual tumin an pung khawm tawh a, hetah hian chhiatna a thleng ta niin an sawi a. Thi zat hi la danglam thei reng niin an sawi.
Nilaini bikah hian thuneitute chuan mi an tam zual an ring a, venhimna pawh khauh zawka ruahman niin damdawi thiamte pawh chhawp tam a ni a. Rel leh bus pawh tlan tamtir a ni bawk.
An sakhaw rin dana an lui thiang hlim pathum – Ganga, Yamuna, leh Saraswati infinna laia inbual hi chhandamna an hmuh theihna niin an ngai a. Innek buaina a thlen hnuhnung ber chu kum 2013 kha niin mi 36 vel an thi.
Prime Minister Narendra Modi chuan Uttar Pradesh Chief Minister Yogi Adityanath be nghalin ‘a tul ang apiang’ ti turin a ti a, venhimna leh thil dang kalpui dan pawh ennawn turin a ti a. Modi-a hian Kumbh hman mek hi a ngaihven hle tih a hre chiangte chuan an sawi.
Adityanath chuan Prayagraj-a biakzin pungkhawmte chu Ganga luiah hian an hnaih berah inbual tur leh a laili pan kher lo turin a ngen a. “Thuneituten ruahmanna an siam kha zawmin thawhpui zawk rawh u. Mite chu Sangam-ah thlamuang takin an inbual tur a ni a, eng emaw thu mai mai vawrh darh lo vang u,” tiin X-ah a tar lang.
Innek buaina a thlen avang hian ‘Amrit Snan’ chu ti rih lo tura tih a ni a. Video leh thlalak thehdarhah chuan ruang leh hliam tuarte chu hlangin lak sawn an ni a, thenkhat khawlaia lo tap pawh an hmuh theih.
Video dangah chuan mi nazawngin an rah phal loh tura duan chhuat phah pawh dim tawh lova an sahim nana insaseng lai pawh hmuh tur a awm.
Reuters news agency chuan ruangte chu lui kam, chhiatna thlenna hmun atangin ambulance-in an phur chhuak zut zut niin a tar lang.
Thuneitute chuan zing dar 01:00 vela innek buaina chhuak hi a tirah chuan ngaimawh tham pawh a ni lo niin an sawi a; mahse, a chhan chiang takin an sawi thei lo thung.
Khawvela sakhaw thila punkhawmna lian ber, Maha Kumbh hi pung khawm an tam thin em avangin ruahmanna pawh uluk taka siam thin a ni a, kum dangah pawh innek buaina tenau deuh pawh a lo thleng fo tawh thin.
Tun tuma thleng hi he chanchin ziah lai thleng hian chanchin kimchang leh a chhan chiang taka hriat theih a la ni lo va, thi leh hliam tuar zat pawh hi an la pung thei niin thuneituten an sawi.