- George L. Ralte, Vaivakawn
Kan Mizo zingah hian thu leh hla thiamna lamah sap tawng thiamna ah te,thu leh hla han chheh mawi lamah leh hriatna zau tak la khawm thei tur a Wiliam Shakespeare nihna chelh thei leh hming in vuah thei tur hi an la vang hle in a rinawm. William Shakespeare chanchin hre thei tur chuan a thu leh hla sulhnu thenkhat te chhiar taimak a ngai viau awm e.
Hla phuah thiam kan hriat lar thenkhat heng – William Wordsworth te, Lord Byron te, John Keats te, leh mi dang te nen a huang khat ah an zal za zawk tih erawh an chanchin kan chhiar thin atangin kan hre thei awm e.Heng mite kut chhuak hi a mawl mangin lang mahse a chhiar a nuamin, mipui nawl pui nun an phawrh thiamin, an thu leh hla te hi heng mite ngaisangtu tan chuan lung ti leng tak leh lai ril fan an nih hlawm a rinawm a ni.Keini Mizote ah hian William Shakespeare thu leh hla te hi kan la hmel hriat tlem deuh avangin a nihna tak kan zuk hre pha lo thin a ni.Chuvang chuan kan ngaih ruatna in a nihna awm ang kan zuk ral khat hriat avangin han bel chiang tak tak phei chu kan Mizo zingah hian an tam vakin a rinawm loh.
Shakespeare chanchin a kan hriat danin Shakespeare hi tawngkam ril tak hmang thiam,nalh thei ang ber leh dik leh mawi thei ang ber a pho lang thiam tak niin hla phuah thiam thenkhat ten an hla phuah vawi khat a chhiar a hre thiam nghal thei ang chi leh thu leh hla rem nghal mai ang chi kha i lovin, thu fing leh ril tak hmanga a kut chhuak te chu hawi lam leh kawh a tum, a awmzia chhut fe hnu ah ngaih ruatna nen a hriat thiamna kal pui ngai a nih zel avangin chutiang mi chu kan Mizo zingah an awm a la rinawm chiah loh a ni.
Khawvel a mi langsar tak pakhat chuan William Shakespeare chungchang hetiang hian a tarlang a, tun ah zawng a kam chhuak te kawng hmang nei a hre thiam turin a kut chhuak te kan bih tlang tan ta a nih hi a lo tih angin William Shakespeare a kut chhuak hi zir tham a nih mai bak ah a thu leh hla te nih phung hi William Shakespeare ziak chhiar thin chuan in hre thiam mai awm e.William Shakespeare anna hi a thu leh hla thiamna chauh a nih loh zia kan hre fiah nghal thei mai awm e.Kan Mizo zinga kan ziak mite kut chhuak chik mite chuan thil awm sa reng kha thu leh hla ah mawi takin an tarlang thin tih kan hmu thei ang a, thu chheh dan kal hmang nalh tak tak te chu zir tham a lo tling thin a ni.
Thil mak ve tak mai chu mit a kan hmuh reng,beng a kan hriat kan sawi thiam mai si loh,mawi tak leh dak thlarh an han rem chhuah kawngah hian kan Mizo zingah hian eng tik ah tak awm ve tak ang maw.