Aizawl: Lawngtlai CYLA Hall-a ZPM party-in mi thar lawmluh inkhawm an neihah Adviser to Chief Minister Lalmuanpuia Punte, MLA, chuan ram rorelnaa Pathian ram tung ding tur chuan inhmangaih tawnna a pawimawh tih a sawi.
Lalmuanpuia Punte chuan, “ZPM party chuan ram rorelnaa Pathian ram tundin tumin hma kan la mek a, Ram rorelnaa Pathian ram tungding tur chuan, inhmangaih tawnna baka pawimawh hi a awm chuang lo, kan ramah party politics ruihchilhnain mipui thinlung hun rei tak a luah tawh a, party awmna in an loh avanga thenawm khawveng, u leh naute inbe hleithei lo kan awm fo thin,” tiin, kalphung thar mipui sorkarah chuan mipui thinlung leh rilru put hmang an thlak a ngai tih a sawi.
ZPM chuan policy an dah pawimawh hle tih sawiin Lalmuanpuia Punte chuan, “Kan lo sawi tawh angin Autonomous District Council-ah pawh direct funding tha taka an hmuh hi kan duhpui a, MLA inthlan hma daih tawhin ZPM Political Affairs Committee chuan, ‘ZPM-in sorkarna kan chan hunah Central sorkarin ADC te direct funding chungchang min zawh chuan positive comment kan pe ang’ tih kan pass sa vek tawh a, tunah kan lo sorkar ta a, central sorkarin min rawn zawh phawt chuan ADC te tan direct funding hi kan recommend ngei dawn a ni,” a ti.