MPYCC chuan thuchhuah siamin PWD Minister Vanlalhlana sorkar office dawhkan atanga ZPM tana a campaign chu dah bawhchhiahna a nih thu an tar lang.
Congress Thalai chuan PWD Minister Vanlalhlana chuan Mizorama thleng ngai lo leh la awm ngai lo, sorkar office dawhkan zahawm tak atangin ZPM tan a campaign-na video clip tichhuakin ZPM worker-ten an tidarh nasa hle, tiin, “Hei hi dan bawhchhiatna leh mipui zah lohna dik takah kan ngai a, mipuiin rilru fim leh duhthlanna ngeia an aiawha roreltu tur an thlen theih nan a tul angin hma a la zui dawn a ni,” tiin an tar lang.
Febuary 12, 2025-a village council leh local council thlanna neih turah hian mipui aiawha ram rorelna thutthleng tibawrhbanga thuneihna hmang sualin, ZPM sorkara chief minister, minister-te, MLA leh an party worker-ten mi dang dikna leh zahawmna palzuta thlemna leh tawktarh tenawm tak tak nena kohhran leh NGO kawra hmanga an che vak mai hi pawi an tih thu an tar lang bawk.