Aizawl: Sports Minister Lalnghinglova Hmar chuan nimin khan Union Minister for Development of North Eastern Region (DoNER) Jyotiraditya Scindia chu New Delhi-a a chenna inah a hmu a, DoNER ministry kaltlanga Mizoram leh northeastern-a sports tihhmasawn theih dan hrang hrang an sawipui.
Lalnghinglova Hmar chuan India ramin Olympic Games 2036 thlen a tum a, sports talent tha awmna Mizoram leh northeast state dangte pawh an phur thar hle tih DoNER minister a hrilh a. Olympics 2036-a India aiawh tam zawk chher turin Mizoram leh northeastern state dangten infrastructure leh infiammi tihhmasawn kawngah sorkar laipui, a bikin Ministry of DoNER puihna an mamawh tih a sawi.
DoNER Minister Scindia chuan Mizoram sports minister chu tha taka lo dawngsawngin sports discipline hrang hrangah result lian tham nei thei tur project siam uar turin a lo chah a. Project proposal tam zawk nen New Delhi-a inhmuh leh thuai a duh thu sawiin, Mizoram chu theihtawp chhuaha puih a inhuam tih a lo hrilh a. Mizoram nuam a tih thu leh remchang hmasa bera zin leh a tum thu a lo sawi bawk.