Aizawl: Nimin khan Durbar Hall, Raj Bhavan-ah ‘Ek Bharat Shreshtha Bharat’ hmalakna hnuaiah Mizoram Larsap Gen (Dr) Vijay Kumar Singh, PVSM, AVSM, YSM (Retd) chuan Uttar Pradesh state leh Dadra & Nagar Haveli leh Daman & Diu union territory-te Foundation Day lawmna hun a buatsaih.
Uttar Pradesh Foundation Day hi January 24 niin Dadra & Nagar Haveli leh Daman & Diu Foundation Day hi January 26 a ni a, remchan zawkna avangin nimin khan lawmsak an ni.
Ek Bharat Shreshtha Bharat programme hian state leh UT hrang hranga cheng hnam hrang hrang, hnam ziarang leh nunphung inang lo tak takte inkara inpawhna tha zawk siam leh an inkara inhriatthiam tawnna nasa zawk siam a tum a ni.