Aizawl: Health Minister Lalrinpuii chuan a department-a thawktu indaih lohna phuhruk mek zel a nih thu leh natna khirhkhan bik enkawlna lamah sorkarin hma a la mek tih a sawi.
Ningania ZPM Party Office, Venglai, Lungleia mi thar lawmluh inkhawma thu a sawinaah health minister chuan thingtlanga thawktu indaih lohna chu a theih ang angin post ruak za dawn hnawh khah a ni a, theihtawp chhuah zel a nih thu a sawi a. “Health worker lak theihna tura hmalakna pawh a hlawhtling ta a, mi 100 lak thar tura hmalak mek niin, thingtlang lama indaih lohna pawh hnawh khah theih beisei a ni,” a ti.
Health minister chuan NHM atangin doctor 39 lak a nih thu sawiin primary health centre, Community Health Centre leh Upper Primary Health Centre bakah district hospital-a indaih lohnaah dah khah tawh a nih thu a sawi a, “Doctor post graduate zira kalte an awm leh tak avangin hmalak chhunzawm zel turin ruahmanna siam a ni,” a ti bawk.
CT Scan la nei lo district hospital-te tan leh ultra-sound leh X-Ray la nei lote tan hmalak mek a nih thu health minister chuan sawiin, “District hospital-te hi tihchangtluna specialist kan dah chuan Aizawl leh hmun dang pan fo a ngai tawh lo ang a, theihtawp kan chhuah a ni,” a ti.
Natna khirh bik enkawlna lamah tan lak mek a nih thu pawh health minister chuan a sawi a, State Organ Tissue Transplant-na turin national level atangin state tinin neih tura an tih chu an bawhzui a, kum khat hnuah establishment an rem fel a, a thawktu tur transplant co-ordinator te, consultant te leh thawktu dangte hmuh an ni tawh a, operation threatre tur pawh tihfel a ni a, license nghah mek a ni tih a sawi.
“Hei hi kan neih hun chuan phai lam atanga mi thiam an lo kal ang a, kal thlak ngaite pawh thlak theih a ni tawh ang a, lung tha lo zait thlengin kan ti thei dawn a ni,” a ti.
Lung zai thiam an lo kalin Rs. nuai kua sen ngai kha an zai theih chuan Rs. 1.5-in zai a ni tawh dawn tih a sawi.