Aizawl: Nimin khan Dr. Eric Zomawia, Mission Director, National Health Mission (NHM) hoin World Leprosy Day hman a ni a, kumina Leprosy Day thupui chu ‘Unitem Act Eliminate’ tih a ni.
Khuallian chuan Phar natna hi India ram pum puiah kum 2027 hian um bo tum niin hmalak mek a nih thu leh hemi atana thawktu, NHM hnuaia National Leprosy Eradication Programme-ten theihtawp chhuaha a an thawh avangin lawmawm a tih thu a sawi a. Tunhmain India ramah pharten endawng an hlawh nasatzia leh Mizoram ngeiah pawh phar veite tan a inthlahrunawm thinzia a sawi.
Mizoramah pawh department record danin phar natna vei mi 1,500 chuang an awm tawh thu sawiin tun hma phei chuan mi eng emaw zatin an lo thihpui tawh thin a ni tih a sawi bawk.
Phar natna enkawlna damdawi, MDT hi man to tak niin a thlawn liau liauin sorkarin a pek thu a sawi bawk.
Dr. Lalawmpuia Chhangte, State Leprosy Officer, National Leprosy Eradication Programme, NHM-in hun hman hi kaihruaiin kalkhawmte hnenah phar natna chungchanga department hmalak dan leh hnathawh dan report pein Mizoramah tun dinhmunah hian phar natna vei Aizawl district-ah pali, Lunglei district-ah pahnih, Lawngtlai district-ah pathum leh Kolasib district-ah pakhat an awm mek thu a sawi.
World Leprosy Day hmannaah hian health department official-te bakah Mizoram College of Nursing final year zirlaite leh Health Worker Training Institute, Kulikawna final year zirlaite an tel.