- C. Lalhmingsanga
Mizoram sawrkar chuan Local Council leh Village Council Term kal lai thla ruk a pawt tawiin 12.2.2025 ah inthlan hun a ruat a. Mizoram a thil thleng khât tak, mipui thlan LC leh VC te zah lohna (Democracy palzutna nasa tak) a kal luih pui mai a ni lova, zirlaite Final Exam – HSLC, HSSLC leh Promotion Exam hun nasa takin a tibuai a ni. Hetiang taka mipui zahlohna hi Zoram mipui hian kan la hre ngai lo mai nilovin a mak in a rapthlak takzet.
School Calendar 2024-25 ah Primary School leh Middle School te Final Exam hun hi 17-28.2.2025 a ni a, final exam tura an inbuatsaih nasat ngaih lai tak a ni. High School leh Higher Secondary School Final Exam hun hi 8-18.2.2025 a ni a, an ni phei chu an exam hun lai takin election hun 12.2.2025 ah ruat a ni.
HSLC Exam – Practical tih hun tura MBSE in a lo ruat 12.2.2025 ah tak election hun puan hnan a ni hmiah mai a, 19.2.2025 a HSLC Exam leh HSSLC Exam (Practical 14.2.2025) inbuatsaih hun lai tak leh Exam hun pui atana tanlak hun lai tak a ni bawk. HSLC Practical neih hun tur phei hi chu MBSE in 5.2.2025 ah a sawn hma ringawt mai a, School leh naupangte engtin tak inbuatsaih ang maw?
Election boruak in Zirlaite a nghawng buai dawn hle a ni. Hei mai hi a ni lova; LC/VC Election buaipuitu (Official) atan ruatah hian 90% hi Zirtirtu leh Head of Institution te an ni. Poling Station/Booth (Vote thlakna) atan SCHOOL BUILDING hlir hman a ni dawn bawk. Election day hma atanga lo buatsaih làwk a ngai.
Kan sawrkar hrawn mek hian eng vang takin nge heti em em a zirlaite , zirtirtu leh zirna in te ngaihpawimawh leh zah pahna nei miah lova, kum tluana an thawhrimna hmawr an bawkna tur hi an suasam tak mai chu le!!! Year End Vaction hun a hnaih tawh tehreng nen. Mizorama zirlai (PS- HSS) te hian Final result ah an fail emaw an tihthat loh phah dawn tih a chiang a, Sawrkar hian hei hi a mawh a phur ngam ngei tur a ni ang. “HRIATNA TURA BENG NEI CHUAN HRE RAWH SE” kan ti a nih hi.
Hetiang taka nghawng lian tur a ni tih hre chung reng si a, Local Council leh Village Council inthlan hun sawn hma a, inthlan ni hun ruat in kan zirlai duhawm tak takte Final Exam hun a han tibuai ta mai hi chu ngaihtuah chian poh leh a thinrim thlak nasa ting mai a ni.
School Education Minister hian a hunlaiin a dodal ngam lo nge Chief Minister dictator tak mai hian a palzut bawrh mai zawk tih hi ngaihtuah tham tak a ni ta. Hetiang tak hian kan ram hi min hruai zel dawn a nih phei chuan kan hmabak leh zel tur hi engtiang tak nge ni dawn tih Zoram mipuite hian i ngaihtuah ngun ang u.