Aizawl: Seventh Day Hospital, Aizawla kut inthlak buaina thleng kal zelah Vaivakawn Police-te chuan nimin chawhma dar 10 vel khan mi pali an man.
Bengvarna tar lan danin, FIR an dawn bawhzuiin Vaivakawn Police-te hian Roderick Thangdingliana Renthlei (32), Zonuam; Lalduhawma Khawlhring (38), Kanan; Lalsangzuala Ralte (33), Luangmual leh Adenego Lalrinawma (31), Chhinga Vengte an man. He thu ziah lai hian mi pakhat man tumin an zawng mek.
Vaivakawn Police-te chuan danin darkar 24 kawl a phal angin, an mi mante hi nizan lamah an kawl a. Ruahman dan chuan vawiin hian jail-ah dah luh an ni dawn.
Seventh Day Adventist Hospital, Aizawl thuchhuahin a tar lan danin, January 31, 2025-a an hospital-a thil thleng chungchangah Inrinni zan khan FIR an theh lut.
Thuchhuah chuan, “Hospital pawnah insual an awm a, insual hliam pakhat, Chawnpui pa chu kan hospital-ah an rawn admit a nakruh auh angin. A sualpui lo na deuh chu a thianten chhan tumin kan patient pa chu ward chhungah rawn luh chilhin buaina kan hospital-ah a lo thleng. Home minister-in police-te he buaina hi rawn chhui zui tura a hrilh angin Vaivakawn Police Station-a OC leh a police dangte kan hospital-ah an rawn kal, tun mai khan kan Hospital chuan FIR Vaivakawn Police hnenah a theh lut. He thil thleng hi a pawi kan ti,” a ti.