Damdawi lam atana hman thlawhna tê chi chu Zirtawpni zan (India-a Inrinni zing) khan Philadelphia hmarchhaka building eng emaw zat chungah tlain a chuang mi paruk an thi a, leiah mi pakhat thi an awm bawk niin mayor-in a sawi.
Thlawhna hi naupang damlo phur niin a nu leh thawktu pali an chuang bawk a. An vai hian Mexican vel an ni.
An tlaknaa a delh hi car chhunga mi niin Philadelphia Mayor Cherelle Parker chuan a sawi.
Mi 19 inhliam an awm bawk a, a zat hi la danglam thei a ni tih mayor hian a sawi.
Flight log atanga a lan dan chuan thawhna hi reilo te chauh a la thlawk hman niin Mayor Parker-i chuan thuchhuah a siamah a tar lang.
Video darhah chuan thlawhna hi rang takin a tlahniam a, a kang nasa nghal hle tih a lang.
Mexican President Claudia Sheinbaum-i chuan thlawhnaa chuangte hi an ram mi vek an ni tih sawiin pawi a tih thu Spanish-in a chhuah.
Thlawhnaa damlo an phurh hmeichhe naupang hi Tijuana, Mexico-a mi niin Shriners Children’s Philadelphia-ah a natna danglam bik avanga enkawl a nih thu damdawi in thupuangtu, Mel Bower chuan a sawi.
An inenkawl zo va, haw tur an nih thu leh Zirtawpni zing lama damdawi in chhuahsan an ni tih Bower-a chuan a sawi a. Thlawhnaa chuang ve doctor pahnih chu Jet Air Rescue Air Ambulance-a thawk an ni tih a sawi bawk.
Thlawhna hi Northeast Philadelphia Airport atanga tlai dar 06:07-a chhuak niin mel li vel leka hlaah an tla a, Springfield, Missouri pan an ni.
An tlakna vengah hian electric an nei lo nghal a. A darh leng vel chuan car tam tak a tichhia a, khawlaiah a kang nasa hle bawk tih thlalak thehdarhah a lang thei.
An tlakna hi US-a khawpui lian ber pangana, Philadelphia-a mihring bitna lai a ni a, Roosevelt Mall bul lawk a ni a. Chenna leh dawr tam tak awmna lai a ni.
Kang thelhtute chuan Cottman Avenue leh Roosevelt Boulevard-ah in tam tak a kang tih an sawi.
Philadelphia-a Temple University Hospital-Jeanes thupuangtu chuan lei lama lo awm hliam paruk an enkawl thu an sawi a. Pathum chu an chhuah leh nghal.
FlightAware atanga a lan dan chuan thlawhna hi Med Jets ta niin a hma darkar li leka Florida atanga Philadelphia thlawk thleng a ni a. FAA leh National Transportation Safety Board (NTSB) chuan an chhui zui mek.
US-ah hian ni hnih liam ta lekah khan passenger phur thlawhna lian leh sipai helicopter chu Washington DC-ah insuin an tla a, thlawhna pahniha chuang mi 67 an thi vek a. Kum 20 chuang hnua US-a thlawhna chetsualna lian ber a tling.