Mizoram Road Safety Council thutlukna angin lirthei hmanga chetsualna laka fimkhur thla, ‘Road Safety Month’ chu Inrinni, February 1, 2025 atang khan hman tan a ni a. Tun tumah hian thupui atan ‘Fimkhur leh him takin lirthei khalh thin ang che (Driving with Care and Safety)’ hman a ni.
Kumin February thla chhung hi Road Safety Month atan puan niin, a hawnna hi Inrinni khan Transport Secretary Zosangliana hovin Directorate Conference Hall, Transport Office-ah neih a ni.
Hawnna inkhawmah Zosangliana chuan India ramah hian kum 31 chhung Road Safety Week hman thin ni mah se, kum tela accident a pun zel avang leh an dinhmunte a that loh avangin Ministry of Road Transport & Highways (MoRTH) chuan kum 2021 atang khan chawlhkar khat lek hmang tawh lovin thla khat chhung hman nise a tih angin, kum 2021 atang khan Road Safety Month hi ram pumah hman a nih thu a sawi.
Zosangliana chuan Mizoramah mihring nuai 13 vel bawr an awm a, January 24, 2025 thleng khan lirthei register zat chu 3,99,290 vel a awm a. Police record danin kum kalta khan road accident 124 awmin a kaihhnawih avanga nunna chân hi mi 112 lai an awm a. Police record a chhinchhiah ve loh pawh a awm thei tih a sawiin, “Mihring leh lirthei population tlem tê si, lirthei accident avanga nunna chân heti zat kan awm thin hi a lungchhiatthlak hlein ka hria,” a ti.
Lirthei chetsualna thleng thin hi fimkhur deuh sela, pumpelh theih tam tak a awm avangin, he Road Safety Month hman tur hi a pawimawh hle tih sawiin transport secretary chuan, lirthei chetsualna avanga nunna chan an tlak hniam phah ngei theih nan, thawktu zawng zawng te leh mipuite, mahni zawnah theih tawp lo chhuah theuh turin a sawm.
Lirthei chetsualna lo thleng thin hi mithiam te’n an zirchiannaah chuan za zel a 75 hi driver thiam loh vang a nih thu leh, a dang za zela 25 hi chhan dang vang a nih avangin, lirthei chetsualnaah hian a khalhtu driver mawhphurhna a lian ber tih a sawi a. Mizoram lirthei khalh thin zawng zawngten an mawhphurhna pawimawhzia hre thar leh turin a chah bawk.
Road Safety Month hawnna hi R. Lalchhanhima, Addl Secretary, Transport-in a kaihruai a. Director Er R.Lalrammawia leh Lalthawmmawia, DS, Transport te’n thu an sawi a. H. Lalhmingliana, DD, Transport kaihhruaiin thutiam sawirual a ni bawk.
- Transport department chhinchhiah danin, kum 2019 atanga kum 2023 chhung khan Mizoramah lirthei chetsualna tum 423 thlenga mi 355-in nunna an chân.
- Kum nga (2019-2023) chhunga Mizorama lirthei chetsualna tum 423 thlenga fimkhur loh vanga chetsualna hi tum 269 thlengah mi 253-in nunna an chân a. Heng zingah rui chunga lirthei khalh vanga chetsualna hi tum 85 thlenga mi 69-in nunna an chân a ni.
- Wrong side-a tlan vangin lirthei tum 44 chetsualin, mi 28-in nunna an chân a. Lirthei khalh laia mobile phone hman vangin tum nga chetsualna thlengah mi panga an thi bawk.