Aizawl: Central YMA chuan thuchhuah siamin khawchhak lam atanga Mizoram chhunga ruihhlo No. 4 thawn luttu lian nia sawi, tun hnaia tum hnih lai Mizoram tan in atanga tlan chhuak, Lalchhanmawii (C. Mawii), kum 44, Khawmawi, Myanmar chu January 29, 2025 khan Central YMA Kumpuan Duty-ten manin, Champhai Police kutah an hlan.
Central YMA tar lan danin Central YMA hnuaia Kumpuan Sub-Committee-ten kumpuan bawhzuina kawnga theihtawp chhuaha ruihhlo do beihpui an thlak meknaah Mizo thalaite hraia an nunna hial an chân mekna, No. 4 tawlhtu zinga a lian berte zinga mi, C. Mawii hi ruihhlo a rawn thawn luh zui zel dante chhui zuiin man a ni ta a ni.
He hmalaknaah hian Mizoram Police, Excise & Narcotics Department, Sub-Headquarters YMA, Champhai-te leh Burma lama Mizo unaute nen thawhhona tha tak neiin, an thawhpuite chungah Central YMA chuan lawmthu a sawi a. Kumpuan Sub-Committee-a an thawhpuite, nunna hial chân hlauhawm karah ram leh hnam tana huai taka an ding tlat hi an chawimawiin an fak thu an tar lang bawk.
Mizo thalaite, chhungkua leh khawtlang, ram leh hnam anga ruihhlo laka an him zel nan YMA chuan Zoram mipuite thawhhopuiah a sawm bawk.