National Health Mission (NHM) hnuaia programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS) chuan khawvel puma cancer dona ni ‘World Cancer Day 2025’ chu Taxation Department Auditorium, MINECO-ah hmangin, he hun hi Dr. Vanlalsawma, Principal Director, H&FW Department chuan khuallian niin a hmanpui.
Khuallian Dr Vanlalsawma chuan, cancer hian mihring a khawih dan a inan loh avangin, a enkawltu leh damlo chenpuite hian an hriat thiam a tul thin tih sawiin, “Cancer damlote hi mi bik an ni a, hriatthiamna thuk tak nen duat taka kan enkawl a tul,” tiin, hemi kawngah hian thawktute pawh nasa leh zual tan la turin a ngen.
World Cancer Day 2025 puala hun hman hi Dr. Eric Zomawia, Mission Director, State NHM-in a kaihruai a. He hunah hian kumin World Cancer day thupui ‘United by Unique’ hmangin Dr Zirliansanga Chhangte, Gynecologist Oncologist. MSCI Zemabawk chuan kalkhawmte a zirtir a. Dr. Jeremy L. Pautu, Director, MSCI, Zemabawk pawhin Mizoram State Cancer Institute chungchang report a pe.
World Cancer Day hi khawvel pumah kum 2000 atang khan hman tan ni mah se, Mizoramah erawh kum 2014 atang khan hman a ni.
Mizoram State Cancer Institute-in a tar lan danin, kum 2023 chhung khan Cancer Hospital Zemabawk-a cancer natna vei inziak lut, mipa leh hmeichhe belhkhawm hi 2,100 an chuang tawh a ni.