Aizawl: Mi 100 len theihna tura duan, Aizawl Treasury Square-a Lianchhiari Rûn, DIPR New Building-a din Mini Theatre chu nimin khan I&PR Secretary Betsy Zothanpari Sailo chuan khuallian niin a hawng.
Hawnna inkhawmah Betsy Zothanpari Sailo chuan mini theatre chu lemchan lama tui mite hmasawnna tura chhenfakawm tak a nih thu a sawi a. Tun hnaiah Mizoramin film siam kawngah nasa taka hma a sawn leh mipuiten an hlut chho zel leh film tihhmasawn nana apps siam a, film tihhmasawn kawnga sorkarin theihtawp chhuah a inhuam chu thil lawmawm tak nia a hriat thu a sawi a. Nodal department leh film siam lama tuimite inkara thawhhona tha chhawm nun a pawimawh thu a sawi.
Lianchhiari Rûn Mini Theatre hawnna hun hi I&PR Director C.Lalnunkima’n a kaihruai a. Pratap Chhetri, Deputy Director & Nodal Officer, Visual Art chuan din chhoh dan leh hmalak zel dan tur report a pe a. Film siamtu lam leh sawm bikte atangin thusawi tawi ngaihthlak a ni a. Lianchhiari Rûn chungchang tar lanna documentary tawi thlirho a ni bawk.
Report-a tar lan a nih danin mini theatre hi mi 100 len theihna tura duan niin, laser projector leh bungraw changkang tak taktea thuam a ni a. Hawn a nih atang hian film siamtute pawhin I&PR Department-ah dilna thlen hmasain, an film siamte chu mini theatre-ah hian man chawiin an chhuah thei tawh dawn a ni.