Aizawl: MNF Sr. Vice President Dr R Lalthangliana chuan sorkar laipuiin village council leh local council tan ruahmanna fel tak siam sain, state sorkarah sum a pek thin avangin, ruling VC kher neih a ngaih loh thu a sawi.
Village council inthlan lo awm tura South Tuipui Assembly Constituency huam chhunga khaw hrang hrang tlawha an party mite nena an inkawmhonaah Dr R Lalthangliana chuan ZPM sorkarin VC term thla ruk zeta a pawh tawi court-a khinna thutlukna chu hriat la ni lo mah se, MNF chuan engtik hunah pawh VC leh LC inthlan chu an inrin reng thu leh an huphurh loh thu a sawi.
Dr. Thangtea chuan, “VC leh LC tan hian central sorkarin ruahmanna fel tak siam sain state sorkarah sum a rawn pe thin a, central-in VC-te tana sum a rawn pek hi state sorkarin an rawn pek atanga ni 15 chhungin a changtu tur VC hnenah a pek ngei a ngai a, a pe lo a nih chuan hremna atan a pung awmin, VC-te hnenah sum hi a pek tho tho a ngai a ni. Chuvangin, kan khawtlang enkawl tur hian ruling party VC kher neih a ngai lo tih i hria ang u,” a ti.