Aizawl: ZPM Aizawl West II Block chuan an bialtu MLA, Lalnghinglova Hmar-in a bial chhunga hmasawnna hnathawh tur a puan vanga MNF General Headquarters-in an hêkna, State Election Commission-in ‘Model Code of Conduct bawhchhiatna a ni lo’ tia thutlûkna a siam chu lawmawm an ti.
Nimina thuchhuah an siamah ZPM Aizawl West II chuan an bialtu MLA Lalnghinglova Hmar hian a tlin tirh atangin a bial tan thahnemngai tak leh chak taka ke penin bial chhung leh ram pum hmasawn nan theihtâwpin a thawk a. Sorkar chhung la rei lo tak chunga bial tana a hnathawhte leh hmachhawp a neih mekte chhuanawm an tih thu an tar lang.
ZPM Aizawl West-II chuan, “Tuna Aizawl West II bialtu MLA-in hmasawnna hnathawh tur a sawifiah pahnih, Tuikual lui kama Rs nuai 2,000 senga kawngpui siam tur leh Rs nuai 2,535 senga Vaivakawn Bazar sak that turte pawh hi bial mipuiten an engto em em thin, Aizawl West II mai bâkah Aizawl tlak lam leh Mizoram mipui tan pawh thil lawmawm tak a ni. Heng hnathawh turte hi model code of conduct puan hma daih, January 7-a sorkarin a rel fel tawh, DIPR website leh media dangah pawh tar lan tawh a ni,” an ti.
“MNF General Hqrs.-in State Election Commission-a kan bialtu MLA an hek hi hriatthiam har kan ti a. Aizawl West hmasawnna hi MNF General Hqrs. hian min lawmpui lovah kan ngai. Heng hmasawnna hi party bil hmasawnna tur a ni lo va, Aizawl leh Mizoram pum hmasawnna a nih tel avangin party politics khelhna atana lo hmang lo turin kan ngen nghal bawk,” an ti.