Aizawl: Sorkar laipui Ministry of Social Justice, & Empowerment leh Mizoram sorkara Mizoram Social Defence & Rehabilitation Board, Social, Welfare & Tribal Affairs tangkawp buatsaih, Mizoram chhunga ruihhlo ngaite enkawlna hmun (de-addiction centre) hrang hranga thawktute pualin ni hnih awh traingin huaihawt chu nimin khan neih zawh fel a ni.
MSD&RB (SLCA) Conference Hall-a training buatsaihah hian, ruihhlo ngaite enkawlna kawnga a tak tak a tha thawhtute sawm an ni a. Dr. Lalremruati, Associate Professor, Department of Psychology, Govt. Aizawl West College hnen atangin ruihhlo ngaiten nun thar an neih lehna tura, centre-a thawktute pawimawhna leh mawhphurhna te, ngawlveina lak ata khaichhuaktu an nih theih dan te uluk taka zirho a ni a. Ruihhlo leh ngawlveinain a nghawng thalo bakah ruihhlo ngaite hawihhawm taka biangbiak dan turte leh an nun kaihruaitu atana pawimawh tur, counseling skills-te zirho a ni bawk.
Lalduhawma Chawngthu, President, Mizoram Drug User Forum pawhin ruihhlo ngaite harsatna tawh thin leh an nun an sim theihna tura thawktute tana hriattur pawimawh tak tak te a zirtir nghal bawk.
He hun hi Zonunthari, Joint Secretary, Social Welfare, Tribal Affairs, Women & Child Development pawhin nimin khan a hmanpui a ni.