Aizawl: Synod Literature & Publication Board (SL&PB) buatsaih ‘Bible Thu Hlawmte (Topical Bible)’ tih chu Rev. R.C. Lalnghakliana, Synod Moderator-in Synod Office, Devotion Hall-ah Thawhlehni khan a tlangzarh.
Tlangzarh inkhawm hi Rev. Dr. K. Lallawmzuala, Executive Secretary i/c SL&PB-in a kaihruai a, Synod Moderator chuan lehkhabu thar chu a chhiartu apiangten thlarau lamah hlawkna an hmuh theihna tura tlangzarhin, Pathian hnenah tawngtaiin a hlan. Rev. P.B. Zosapthara, SL&PB Editor-in inhmelhriattirna neiin, lehkhabu buatsaih dan leh nih phung tlangpui a sawi.
Kum 2013 October-a SL&PB Board Executive Committee (BEC)-in Topical Bible Concordance siam a rawtna chu SL&PB committee-ah a thlen a. SL&PB Committee chuan rawtna chu pawmin hma la turin BEC chu a ruat a. BEC hian sub-committee a din a. May 2022-a SL&PB BEC thukhawm chuan thar thawh leh a rel a, a project hming pawh ‘Bible Thu Hlawmte’ tih a ni a. A buaipui turin Upa C. Lalbiaknunga, Durtlang North ruatin lehlin leh thil tul dang a buaipui.
‘Bible Thu Hlâwmte’ hi Orville J. Nave-a buatsaih Nave’s Topical Bible behchhana siam a ni a, phek 2,244-a chhah a ni a, thumal/thu hlâwm thlûr bing (entry word) hi 4,628 a awm a, thumal (word) awm zawng zawng hi 15,37,759 a ni a. Bible Thu Hlawmte (Topical Bible) hi Mizo tawnga la awm lo a ni.