Aizawl: MPCC President Lal Thanzara chuan ram mipui manganga rumtirtu ZPM sorkar hian mi retheite enkawltu Pathian pawi an sawi tih a sawi.
Village council inthlan inbuatsaihna hun hmanga Thingdawl, Bualpui, kawnpui leh Lungdai te a tlawhnaah MPCC president chuan ZPM kaihhruai sorkarin Kolasib tlangdung leh Mizoram hmun hrang hrangah leisak tura an intiam, thlai chingtuten an thlai chin sorkarin a rate an tihchhiatsak vek avangin hmunphiah an hralh thei lo tih a sawi a. Chutih laiin, ZPM sorkarin buhfai zaah za an tihto avangin ration buhfai lakna pawisa pawh nei lovin mei alh enin an awm tih sawiin, “Lalna leh thuneihna chan an duh avanga Mizoram mipui bumin retheihna khurah mipui an hruai lut a. An nawmsakna atan mi retheite lu chunga vaivut pawh an it tawh a. Ram mipui manganga rumtirtu ZPM sorkar hian mi retheite enkawltu Pathian pawi an sawi a ni,” a ti.
VC leh LC tha neih a ngai tih sawiin MPCC president chuan, “VC tha kan neih loh chuan khawtlang tha kan nei lo vang. Khawtlang tha kan neih loh chuan chhungkua leh Kohhran nun thlengin kan tuar dawn. ZPM sorkarin an duh duha an kawih hera an inhaivur bikna tur an duh avanga khawtlang roreltute inthlan lo ngai ta hian Congress party min kai harh a. ZPM leh MNF miten Congress party nasa takin an zawm phah ta zawk,” a ti.
Khaw hrang hrang a tlawhnaah MPCC president hian an party-ah mi thar eng emaw zat a lawm lut a ni.