Aizawl: A tul anga thawhho dan tur leh inhriatthiam tawnna tha zawk neih theihna atana pawimawh hrang hrangte sawiin nimin khan Kolasib Bawrhsap Robert C Lalhmangaiha leh Cachar Bawrhsap Mindal Yadav te an inkawm.
Cachar DC Conference hall-a an inkawmnaah hian, Kolasib bawrhsap chuan Mizoramin VC inthlan an hmachhawn turah ramri leh a chhehvelah dan leh thupek kenkawhna lamah a tul anga thawhpui tur leh inpawhna tha zawk a awm theih nan kumin Chapchar Kût lo thleng turah pawh Kolasib-a hmanpui turin a sawm.
An inkawmnaah hian NHIDCL hmalaknaa 4 lane kawngpui laih tur chungchang sawihovin Kolasib-ah meeting neih nise an ti a, state pahnih ramri hnaiha chengte harsatna an tawh loh nan leh thlamuang taka an awm theih nan minister level-a inbiaknaa, joint resolution an lo siam tawh chu vawng zel chungin a tul anga thawh dun zel nise an ti bawk.
He hunah hian David H Lalthangliana, Kolasib SP pawhin Cachar SP leh a hoten Mizoram Police te kawng hrang hranga an thawhpuina ah lawmthu a sawi a, hun lo kal lehzel ah pawh thawhdunpui turin a sawm nghal bawk.
He hun hi August 9, 2024-a state pahnih home minister-ten Assam leh Mizoram ramri-ah inpawhna leh thawhhona tha zawk a awm theih nan, DC leh SP level-ah inbiakna neih thin ni rawh se, tia an thu dah bawhzuina a ni.