AZL: Mizoram Larsap Gen (Dr) Vijay Kumar Singh chuan 23 Sector Assam Rifles Headquarters, Khatla, Aizawl tlawhin an hotute a kawm.
Nimina an inkawmnaah larsap chuan India leh Myanmar ramri vengtu Assam Rifle-te hmalakna fakawm a tih thu sawiin, India ram leh a chhunga chengte himna tura theihtawp chhuah chhunzawm zel turin a chah a. Dan lova ramri kaltlanga chetna ven kawngah tan lak a tul thu sawiin mipuite rawngbawl hna thawh pawh ngai pawimawh zel turin a chah bawk.
He hunah hian larsap hi guard of honour pek niin, Brig Girish Upadhya, DIG, HQ 23 Sector Assam Rifles, Aizawl leh a thawhpuiten an lo dawngsawng a. Mizorama Assam Rifle hmalakna leh pawimawhte an lo hrilhfiah.
Assam Rifle hian Mizoram bikah India leh Myanmar ramri, km 510 vela thui ven hna an thawk mek a. 23 Sector Assam Rifles Hqrs. Khatla, Aizawl hnuaiah hian Battalion pathum a awm a. Battalion tinah Company Operating Base (COB) paruk zel awmin, Indo-Myanmar border ven hna an thawk mek a ni.