Aizawl: Ministry of Development of North Eastern Region (DoNER) buatsaih, North East Investors Summit-a thusawitu, Minister of State Lalnghinglova Hmar chuan Mizoram chu investor-te tana hmun tha, hmasawnna hnathawhna tura kawng hawng zautu a nih avangin Mizoram tlawh tur leh a lam hawi turin investor summit-a kalte a sawm.
Nilaini tlai khan Chennai-ah DoNER ministry buatsaihin investor-te inhmuhkhawmna hun hi neih a ni a, DoNER Minister Jyotiraditya Scindia leh Lalnghinglova Hmar, MoS-ten thu an sawi.
Lalnghinglova Hmar chuan Mizoramin tun hnaiah thlai a thar thahnem dawn a, a bikin sorkarin lei a intiam tawhna – sawhthing, hmarcha, aieng leh hmunphiahte lei tur a awm dawn tih sawiin, “A hlawma lei duhte tan Mizoram sorkarin kawng a hawng zau zel dawn,” tiin, Mizoram sorkar chuan kuthnathawktute bâna a kaih thu a sawi.
Mizorama sawhthing chi hnih – thingpui leh thinglaidum bakah Mizo hmarcha chuan GI tag an neih tawh thu leh, hmun danga hralh chhuah tlak an nih thu a sawi a; a hralhna bakah a sawngbawlna tur din tura thawhpui tur leh Mizoram mau tun aia tangkai zawka sawngbawl tura thawhho pui turin investor te leh industry neitute chu Lalnghinglova Hmar hian a sawm.
DoNER minister pawhin hmarchhak state hmasawnna tura sorkar laipuiin ruahmanna a neihte leh duhsakna a pek dante a sawi a. India hmar chhak chu mau tamna leh that duhna a nih angin a hmun ngeia kalchilha zir chianga hmang tangkai turin industry neitu kalkhawmte a chah bakah, Tamil Nadu-a investor-te chu a taka hmarchhak state tlawha a theihna sang tak hai chhuah kawnga pui turin a sawm bawk.