Khawchhak lam unaute tam tak an rawn raltlan a, an ram buainain ziaawm lam a pan theih miau loh avangin an sahimna zawngin nitin rawn lut an awm belh zel bawk.
Heng mite hian an sahimna zawnga rawn tlanchhia a nih miau avangin Mizoram chhunga chengte pawhin theihtawpin kan duat a, kan ngaihsak ni pawhin a hriat. Hetih lai hian heng hun remchanga hmanga ruihhlo leh a kaihhnawih khawih leh tawlhrukna remchanga hmang an awm thin hi a pawi hle. A nawlpuia hmingchhiatna a nih miau tawh avangin sim leh tih loh tawp hi tha tak a ni.
Hetiang thil duhawm lo hi a thlen leh thin avangin anmahni lam pawhin tihtawp an duh a, raltlante aiawha thuchhuah siam pawh an awm ta fo mai. Dan phal loha ruihhlo leh a kaihhnawih tawlh thinte hi dim an tul lo a, raltlan zingah hetiang ti duh hi awm lo se a tha hle bawk.
Ngaihngam leh lungmuang taka an awm theihna hi he ram mipuite chuan kan duh a ni a, dan lova sumdawnna thil reng reng kalpui tum lo bawk teh se. Chutiang tur chuan raltlante pawhin rilru siam se la, khua leh tui tha ni turin he ramah hian thlamuang takin awm ngei bawk rawh se.
Dan lova sumdawnna, a bik takin ruihhlo leh a kaihhnawih thil reng reng hi man tur a la awm reng mai a, a tih rem leh ven hna thawh kawngah thuneitute thawhpui thiam se la, hremna na zawk tawk thei reng an ni tih thlengin inhre bawk se, hetiang lama fihlim turin raltlante pawhin rilru siam thiam zel se a va tha em.