Revenue Minister B Lalchhanzova chuan Mizoram leh Assam ramri depa awmte in hmun lo ram chin fel tulte a rang lama ching fel turin ruahmanna a kal mek thu a sawi.
Ningania Vairengte Zalen veng Kawna ZPM Serlui North Block-in street campaign an buatsaih hmanpuitu, revenue minister chuan Mizoram hmar lam khaw pawimawh, Vairengte hi tun aia sorkarin a thuam chak a tul hle tih a sawi.
Ramri depa awm khaw hrang hrang a tlawhnaah ram pass neih mumal loh avanga an ram an hum theih loh chhan an hrilh tih sawiin minister chuan, “In hmun lo ram pass pek kawngah kan lo hnufum rei hi a pawi hle a ni. Hei hi chak zawka bawhzui mek a ni,” a ti.
B Lalchhanzova chuan ZPM-in sorkarna an siam hmaa ram inrelbawl dan a mumal loh avangin, revenue department bikah phei chuan ram pass la tihfel loa enliam tam tak, mipui harsatna siamtu tam tak a awm tih a sawi bawk.