Chief Minister Lalduhoma chuan sorkar hnathawk pawl thenkhat, mahni pawl hamthatna tur dapa nasa taka sorkar nawr ching an awm an remtih loh thu a sawi.
Nimin khan chief minister hoin Secretariat Conference Hall-ah Minister Lalrinpuii enkawl, Health department leh Social Welfare & Tribal Affiars department hnathawk dan thlir let a ni a. Chief minister chuan kalphung thara kal chho zel an nih avangin an kalphung thar hian an lo kal dan tawh sa a nek fo dawn tih sawiin, inthlakthleng ngam department ni vek turin department zawng zawngte a chah a. Hma an lakna turah ‘a theih loh dan’ lo dap lova a theih dan lo dap hram hram zawk tura an beisei thu a sawi.
Aikal la kalpui ru an awm leh awm loh khauh taka kalpui mek tih sawiin chief minister chuan, “Service Review Committee din a, sorkar hnathawk chhawr tlak lote dap chhuaka voluntary retirement scheme hmanga chawlhtira, chhawrtlak lak mai tha kan ti,” a ti.
Chief minister chuan sorkar thuruk vawn kawngah dan an zawm tura chahin, “Sorkar hnathawk pawl thenkhat, mahni pawl hamthatna tur dapa nasa taka sorkar nawr ching an awm kan rem ti lo. Dan a ni lo. Service rivalry nasa lutukte tha kan ti lo,” tiin, duhsak bik an nei lo va, ram tana tha chu an ti zel dawn tih a sawi.
Minister Lalrinpuii pawhin a department enkawl pahnih hmalaknate sawiin, IMR-ah Mizoram chu kum hnih chhung India rama a hniam ber (pakhatna) a ni tawh a, a rate chu 3 per 1000 live birth niin, thingtlang lama thawktute inpekna vanga ngaih a nih thu a sawi a. Directorate of Hospital & Medical Education hnuaia damdawi inah khum 1,057 a awm mek thu te, Directorate of Health Services hnuaiah khum 500 a awm thu te, ZMC&H-ah khum 420 a awm thute leh private hospital-te khum neih zat belh khawm chu 1,760 a nih thute a sawi a. Mizoram (Aizawl Civil Hospital)-a kal (kidney) thlak ve theih dan tur dap mek a nih thu te, Mizoram sorkar hnuaiah specialist leh superspecialist 169 an awm mek thute a sawi.
Lalrinpuii chuan tun hnaiah doctor thar pakua MPSC-in a la thar a, NHM atangin ZMC a zir chhuak doctor 43 rawih an ni mek a. Mizoram sorkar chuan health worker thar 100 lakna tur a lo phalsak tawh a, umzui mek a ni a. Nurse thar lakna tur pawh a lo pawmpui tawh tih a sawi bawk.
Social Welfare & tribal Affairs department lamah chuan ruang phurhna atan sorkarin budget Rs. 5 crore a dah a, heng zinga Rs 23,33,314 chu diltu mi 238 hnenah pek tawh an ni a, dilna 82 a la awm mek. Online hmanga dil theiha duan mek a ni a. Tar pension (IGNOAPS), hmeithai pension (IGNWPS), disable pension (IGNDPS) leh National Family Benefit Scheme hmangin tun sorkar kum kal mekah central share for April to June, 2024 atan Rs. 250.28 lakh leh state share for April to September, 2024 atan Rs. 1,695 lakh pek chhuah tawh a ni.
Article 275 (1) hnuaiah kum 2023-24 chhungin project 54 atan Rs. 2,897.97 lakh chu Implementing Agency ah pek tawh an ni a, kum 2024-25 atan project 52 chu central sorkarin a remti tawh a, sum hi Rs. 2,134.80 lakh dah (allocate) a ni bawk.