MNF Legislature Party Leader Lalchhandama Ralte chuan ZPM kaihhruai Mizoram sorkarin Indian Air Force (IAF) kutah Lengpui Airport hlan tura ruahmanna an neih chu Mizo mipui tam tak duh loh a nih avangin inngaihtuah nawn se an duh tih sawiin, an hlan a nih chuan ram mipui pawi a khawih dawn tih a sawi.
Inrinni khan MNF Legislature Party chuan airport tlawhin a dinhmunte an en bakah Mizoram sorkara aviation wing-a an hotu, Saidenga leh a thawhpuite kawmin thil pawimawh hrang hrang an sawipui.
Leader of Opposition Lalchhandama Ralte chuan ramin a neih chhun leh a roh em em, Lengpui Airport sak mek chungchang te, sorkar liamtain an ruahman runway siam tura ruahmanna an bawhzui dan te, chief minister-in an sorkar tuk lawka airport ram zau ta anga a sawi chungchangte a hmuna enfiah tur leh airport chungchang hi MNF legislature party-ten Mizoram Assembly Budget session lo awm tura an thu hlawm lian tak tur a nih dawn avanga mipui aiawha tlawh an nih thu a sawi.
IAF kut Lengpui Airport hlan tura sorkarin ruahmanna a siam chu MNF Legislature party chang ni lo, MNF party ang te, Mizoram Congress party ang te, NGO zawng zawng pawhin an duh lo tih sawiin Lalchhandama Ralte chuan, “Mizoram rohlu a ni. Hei hi chu tihral kan phal lo a ni tih hi Mizoram sorkar hian ngaihtuah nawn se. An tilui a nih chuan ram mipui pawi an la khawih dawn a ni,” a ti.
Chief minister mual liam tawh, Brig. T. Sailo leh Laldenga bakah la dam, Lal Thanhawla leh Zoramthanga ten airport atana theihtawp an lo chhuah tawh a, kum 25 chhung zet an enkawl a. ZPM-in sorkarna an chan atanga an hmalakna hmasa berah mi dang kuta hlan an rel nghal a. Chief Minister Lalduhoma’n Delhi a kal hmasak bera a lo hawah Lengpui Airport chu AAI hnenah emaw, Adani Group hnenah emaw hlan tum anga ruahmanna an siam nghal tih sawiin, “AAI leh Adani Group chu thuhran pawh ni se, kan sorkar hian IAF kutah hian pe ta se vawiina kan thlawhna thlawh ang hian a thlawk reng thei ang em? Reilo teah airport sir leh sirah hian indo thlawhna thuhrukna tur blast pens siam a ngai ang a, missile dahna turte pawh ruahman a ngai ang, indo hmachhawn thei turin airport hi ruahman a ngai dawn a ni,” tiin, ZPM-in kum khat awrh chauh a enkawl hman tiha hralh an tum nghal hi hriatthiam har a tih thu a sawi.
Boruak hmanga khawvel dang leh state dangte nena inkalpawhna awmchhun tawp rup thei anga lang leh thla thum bak license a nung tawh lo ang tih ngai khawpa a awm pawh thil zahthlak tak a ni tih sawiin Lalchhandama Ralte chuan, an sorkar lai khan tuna runway sirah hian runway dang siam tumin hma an la tih a sawi a. Central lamah pawh DPR thehluh a ni tawh thu leh he runway hi puitlin a nih chuan international airport neih te pawh beisei a nih laia IAF-te pek tum a nih chu a hrialhhai thlak a tih thu a sawi bawk.
MNF Legislature Party-in Lengpui Airport an tlawhnaah hian Leader Lalchhandama Ralte bakah Lalrintluanga Sailo, L. Rohmingliana, Ramthanmawia, K. Laldawngliana, H. Lalzirliana leh Lalrinsanga Ralte te an tel a ni.
Sorkar in runway siam thatna tur sanction fel tawh
Mizoram sorkar chuan Lengpui Airport-a thlawhtheihna tlankawng (runway) siam that nan Rs vbc 80 a sanction fel tawh.
Inrinnia MNF Legislature Party-in Lengpui Aiport dinhmunte an enfiahin Mizoram sorkara aviation wing hotute nen an inkawm a. An inkawmnaah aviation wing hotu, Saidenga chuan airport-a tlankawng (runway) chu tun dinhmunah a chhiat tawh avangin thla thum hnuah license tihtawpsak theih reng a nih thu a sawi a. Hemi bawhzui hian Mizoram sorkar chuan tlankawng siam that nan Mizoram sorkarin February 5, 2025 khan Rs vbc 80 a ruahman fel tawh tih a sawi.
Saidenga chuan Lengpui Airport-a tlankawng chu major repair a ngai tih a sawi a. Tuna runway chu khawk vekin, a thara siam tuma buaipui mek a nih thu a sawi a. India rama runway siam tawh thinte chu biakpawh mek niin, PWD-te nen thawk hovin siam tura hmalak chhoh mek a nih thu a sawi.