Aizawl: Mizoram People Forum (MPF) chuan village/local council inthlan lo awm turah politic party mi nihna dah bovin mi dik leh rinawm thlang turin mipui an ngen.
Thuchhuah an siamah MPF chuan tualchhung rorelna hi zim angin lang mah se, Mizoram kal zel dan tur hlimthla a nih theih avangin vote nei tawh phawt chu he inthlannaa vote pe/thlak ngei turin an ngen a. Mahni chenna zimte tan pawha khua leh tui mawhphurhna an hlen thei lo a nih chuan khawtlang hruaitu tha neih an beisei thiang bik lo vang. Khawtlang hruaitu tha siam turin tha teh nan party leh chhungkhat nihna aiin Pathian tihna a pawimawh zawk tih hre thar turin mipui an chah.
MPF chuan village council/local council member thlanna neih turah hian candidate zingah sorkar leh kohhran duh loh zawnga sum lalut mi an lo awm a nih chuan eng party mi pawh ni se hnualsuat tur leh, mi rinawm, therhlo leh corruption sum laka inthiarfihlim ngam mi ngei an thlan chhuah theih nan politic party mi nihna dah bovin mi dik leh rinawm thlang tur te; khawtlang rorelnaah party duh dan aia Pathian duh dan ngai pawimawh tur mi thlang turte, chhungkhat, vua leh vang leh thian tha nihna dah bovin Pathian tih tak tak mi chauh vote turte, veng leh khawtlangah Pathianin lalna a chan theih nan inthlanna boruak hi Pathian dahlal nana hmang turin leh candidate-te pawh Pathian leh mahni lawina kohhran inkaihhruaina aia party hruaitute duhdan dah lal lo zawk ngam turin an ngen a ni.