- T. Lalthazuali; 4th Semester, MA Pol. Science, ICFAI University, Mizoram
Tun hma leh tun hun thlenga Mizo mipui ten kan buaipui leh kan ngaihven ber chu “Politics” hi a ni ti ila kan sawi sual awm lo e. Kum 1972 a Mizoramin zalenna a sual chhuah hnuah Mizoramin harsatna hrang hrang a tawk a, ramin hma a sawn theih nan leh ram alo intodelh zawk theih nan hmalakna hrang hrang te neih a ni bawk a ni. Tunlai kan ram dinhmun thlir pawhin hmasawnna tur tam tak a la awm tih a lang chiang em em a, hemi kawngah hian political party hrang hrang te pawhin theihtawp an chhuah bawk a ni. Politics chungchang kan hriatna hmasa ber ni a lang chu “Chhungkuaah” hian a ni a. Chhungkua hi engkim kan in zirtirna hmasa ber (first institution) a ni a, naupangin school an rah hma atang tawhin chhungkua atang hian thil tam tak an zirchhuak a, chutiang bawkin a tam zawkin politics chungchang kan hmelhriatna hmasa pawl chu chhungkua hi a ni.
Chhungkua azirin politics kan hmelhriat chhoh dan pawh a dang zel a, hemi avang hian a tam zawkah chuan political party awn lam neih pawh a awlsam em em a. Chhungkuaah chuan TV leh newspaper khat vek hman a ni a, hemi avang hian politics mai ni loin thil hrang hrangah thlirdan thu hmun a neih tir thin a, sakhaw khat vuana engkim sawihona a nih avangin society-a an thlirdan pawh a thuhmun viau thin a ni. Educational institution (zirna in) hi a pawimawh em em bawk a, hemi atang hian naupangin thil hrang hrangah thlir dan dang an rawn nei chho a, a zau zawkin thil an thlir tawh a, ngaihdan pawh a rawn dang chho tan thin a. An upat hnu thlengin hei hian nghawng lian tak a nei a, chuvangin sikul atanga inzirtirna tha tak neih hi a tulin a pawimawh em em a ni. Zirna piah lamah debate, quiz leh thil sawihona hun te sikulah neih thin a ni a, heihian thalai ten politics chungchanga an ngaihdan siam kawngah nasa takin a pui thin bawk a ni.
Tin, thianhoa ti ti naah te pawh politics chungchanga an vei zawng te, ramin hma a sawn theihna tura an ngaihdan te pawh an sawiho thin a. Heihian thalai teah thlirdan dang a neih tir thin a, kan chawrchhuahna a zir leh kan chhehvela awm te hian kan rilru sukthlek hi nasa takin a tidanglam thei a. Chuvangin nuapan tet atanga chhungkua atanga inzirtir dan hi a pawimawh em em a, chhungkaw inzirtirna phei hi chu thanhnan a awl em avangin politics chungchang bikah phei chuan fimkhur tak leh naupang te rilru a dik lo zawnga hruaikaw lo tura uluk taka inhrilh a, inzirtir a tul a ni. Social media hian inbiakpawhna lamah nasa takin hmasawnna a thlen a, inbiakpawhna te tiawlsamin Mizoram chhung mai ni lo khawvel pum huapa thil thleng te pawh kan hriat theih phah a ni. Social media hian thalai te mai ni loin naupang te te atanga upa ber thlengin min chiah hneh tawh em em a, a thatna tamtak sawitur a awm rualin a thatlohna tam tak sawi tur a awm bawk a ni.
Thalai te zingah social media platform hrang hrang heng – WhatsApp, YouTube, Facebook leh Instagram te hi a lar zual em em a, a tam zawk chuan an hmang vek bawk awm e. Zirna lam thlenga hlawkpui sawitur an awm rualin a thalo zawnga hmang leh chhiatpuita te pawh sawitur an awm bawk a ni. Khawvel thiamna sang chho zelah hian social media hmang hi an pung zel a, chutiang bawkin kan ram Mizoramah ngei pawh hian ni tinin kan pung ve zel bawk a ni. Social media kaltlang hian ram danga thil thleng te kan awm hmunah nuamsa takin kan lo thlir ve thei zel tawh a, chumai bakah chuan kan ni tin nunphung pawh a tiawlsam em em a ni.
Amaherawhchu, mi tam takin an thatpui leh an tangkaipui hi midang tan chuan chhiatna thlentu pawh a ni ve thei bawk a ni. Social media tel lo chuan kan awm thei tawh meuh lo ti ila kan sawi sual lovang, kan nitin nunah a bet tel tlat tawh a ni. A bik takin thalaiteah WhatsApp, YouTube, Instagram leh Facebook hmang an tam zual bik em em a, heng social media platform hrang hrang atang te hian kan rama thil thleng te awlsam takin kan hriat phah thei a, kawng hrang hrangah thalai te rilru sukthlek pawh a tidanglam nasa em em a ni. Politics huangchhungah pawh social media hian pawimawhna tam tak a nei a, mipui te pawhin an tangkaipuiin politics mai ni lo thil hrang hrang an hriat duh leh pawimawh tak tak lak nan an hmang bawk a ni. Hemi a nih rual hian social media kaltlang hian Mizorama political party hrang hrang te chanchin, a tha lo zawnga sawina hmuh tur pawh a awm fur a, an thatna sawina tam tak hmuh tur awm tho mahse party hrang hrang sawichhiatna hmuh tur awm te hian a bik takin thalai te rilru sukthlek a tidanglam nasa em em a, hei hian an vote thlak thlengin a nghawng thei bawk a ni. Tin, thubelhchian dawl lo tam tak pawh hmuh tur awmin buaina lian zawk hial pawh a thlen thei a, thalai tam zawk ten social media hi politics chungchanga kan information hmuhna tam zawk a nih avangin thubelhchian dawl lo han thehdarh mai te hi a awlsamin thlirtute tana a dik lo zawnga rilru la thei thil thehdarh te hi tih loh hram a tha awm e.
Mipui zalenna ram kan nih angin social media kaltlang hian politics chungchangah kan ngaihmawh zawng te, kan ram tana hmasawnna thlen thei thil te pawh tarlana sawiho te pawh a ni thin a. Heihian abikin thalaite tan kan ram siamthatna kawnga an vei zawng te sawi chhuah nan hmun pawimawh tak a luah a, thalai tam tak ram hmangaihna avanga rawn au chhuak te pawh an awm zel a ni. Tin, social media kaltlang hian vote thlak pawimawh zia te pawh tarlan a ni thin a, mipui dikna leh chanvo inhrilhhriatna kawngah pawh pawimawhna lian tak a nei a, mipui ten politics chungchang chiang lehzuala an hriatna kawngah pawh a pui nasa hle a ni. Chuvangin, social media hi a tha zawnga hman a nih chuan mimal mai ni loin ram pawhin hma a sawn pui thei dawn a, a hman dan kan thiama kum naupang zawk te pawh a hman dan tawk kan in zirtir a tul hle a. Midang te pawisawi thei zawng leh midang te tina thei zawng ni loa mimal, khawtlang leh ram pawhin hma a sawn theih nan a hmang tura in zirtir a tul hle a ni.
Heng kan tarlan bakah hian Political party pawh hian thalai ten politics an hmelhriat dan kawngah hmun pawimawh tak a luah a, party inrelbawl dan leh an hmalakna hrang hrang te hian mipui ten political party an hmuhdan a thlak kual thin a ni. MLA inthlan dawna party hrang hrang ten ramin hma a sawn theihna tura mipui te hnena an thu tiam te hi mipui te chuan hre rengin an vote ta thin a. Amaherawhchu, ram hruaitu ten an tih tur an tih leh si loh te hian mipuite rilruah nghawng a nei nasa tawh thin a, heihian party-a helna a chawkchhuak thei thin bawk a ni. Inthlan dawna party hrang hrangin an thil tum leh an party au hla te hian mipui te rilruah hna a thawk nasa thin hle a, chutiang a nih rual chuan tun hma atanga mipuiin an thlan tlin ram hruaitu te lak atanga an hmuhtur ang an hmuh thin loh avang leh ramin hma a sawnna tur kawnga an hmalakna tur ni a an sawi fo thin heng – kawng siam that, ram intodelh, ram leh hnam humhalh, zirna leh damdawi in tihchangtlun te hi tun thlengin hmasawnna hmuh tur a la tlem em avang te hian thalai te leh mipui tam zawk te rilruah sorkar laka lungawi lohna leh ram hruaitute rin harsatna a thlen ta a ni ti ila kan sawi sualin a rinawmloh. G.A. Almond leh G. Bingham Powell te chuan “Chhungkua leh Sikulin politics kaldan phung rilrua ngaihdan a lo tuh tawh chu eng ang pawhin tha mahse, sorkarin a khua leh tui a ngaihthah chuan politics huangchhunga a ngaihdan chu a danglam thei a ni” tiin an lo sawi a. Hei hian Political party hrang hrang ten mipuite thlawpna an neih theihna tur kawngah pawimawhna tam tak an nei tih hre reng chunga mipui ngaihdan thlir paha ramin hma a sawn theih nana hma an lak zel a tul a ni tih a lan tir a. Eng ang pawhin chhungkuaah leh sikulah te in zirtir mah ila ram hruaitu te hmalakna bawk hian mipui te rilruah hna a thawk nasa leh nge nge thin a ni.