Aizawl: Central YMA chuan Aizawl khawpui chhung YMA branch leh Kumpuan Sub-Committee hruaitute pualin Ruihhlo Do infuihtharna hun an hmang.
Nikum October 24-a YMA Rorel Inkhawm vawi 4-na R. Dengthuama Hall a neih tuma ‘Ruihhlo Do na khawngah nasa zawk a hmalak ni rawh se’ tia a rel angin, Zirtawpni zan khan Vana pa Hall-ah Ruihhlo Do infuihtharna hun hman a ni a. Central YMA President Lalhmachhuana chuan ruihhlo do turin YMA hruaitu leh member te, nu leh pa, kohhranho-te thahnemngai taka pen chhuak tur leh ruihhlo do pui turin a sawm.
He hunah hian Aizawl chhunga branch 109 atangin hruaitute leh branch YMA hrang hrang a kumpuan sub-committee mi 900 bawr vel an kal khawm a ni.
He hunah hian Mizoram rohlu, Lengpui Airport IAF kutah hlan a nih lohna tura Central YMA leh NGO Coordination Committee-in hma a lakna an thlawp a. IAF kuta hlan hi an rem tih loh thu leh Aizawl khawpui laili a awm mek, Assam Rifles chhuah hunah an awmna leh a chhehvel mipui vantlang tana hman a nih theih nan leh mi mal, pawl, political party leh kohhranten remchang la lo tura YMA hmalakna thlawpin theihtawp chhuaha hmalak zel tha an tih thute resolution an pawm a ni.