Aizawl: All Mizoram Village Council Association (AMVCA) President K Lalngaizuala chuan Mizoram sorkarin VC term dinglai thla ruk chuang zeta a pawi tawina high court-a an khinnaah hnehna an chang zo ta lo chu mipui rorelna bulthut, VC-te sorkar apiangin an duh huna an namthlu zel thei dawn tih sawiin, pawi an tih thu a sawi.
Inrinni khan Aizawl Press Club-ah thu thar thehdarhtute kawmin AMVCA President K Lalngaizuala chuan Mizoram sorkarin VC term ding lai a pawt tawi hi sorkar hian a chhan engmah a sawi lo a, VC ding laite min rawn derna emaw, mipui aiawhte emaw, political party dangte biak rawnna emaw pawh engmah a awm lo tih a sawi.
Hetianga sorkar ding laiin VC term pawt tawia a hun hmaa inthlanna buatsaih a tum tlang ta hi party dang VC-te dah bo thuai thuai an tumna leh ruling party sawhngheh tumna liau liau a ni tih a lan avangin mipui thlan VC-te zahawmna vawng hima democracy ropuina venhim tumin dan rorelna, high court-ah an zualko ta a. Hetihlai hian sorkar hotuten an thuneihna an lek khum chhan ber, an term ding lai pawt tawi tura thutlukna an siam khum chhan, an rilru kha dan rorelnaah chuan buk tel theih a lo ni si lo a, dan hmanga an beih letnaah hnehna an chang zo ta lo tih a sawi.
Sorkar an khinnaah hnenah chang zo ta lo mah se an tum ber, court kawngkhar hial an kik chhan hi hun lo kal zel tura mipui aiawha thlan VC te zahawmna vawn him a ni tih sawiin K Lalngaizuala chuan, “Hemi kawnga AMVCA member-ten theihtawp kan chhuahnaah kan lawm a. Hetihrual hian mipui rorelna bulthut, VC te, sorkar apiangin an duh huna an nam thlu zel thei dawn ta hi pawi kan tih lai ber a ni,” a ti.
K Lalngaizuala chuan, VC dinglaite an namthluk chhan leh a hun hmaa inthlanna an neih luih pui chhan ber nia Mizoram sorkarin Court-a a sawi, 15th Finance Commission atanga Mizoram sorkarin Post Devolution Revenue Deficit Grant (PDRDG) a hmuh tlak hniam zel vang a ni tih chu pawm harsa an tih thu a sawi.
AMVCA president chuan sorkar ding laiin VC-te an hmuh dan leh an enkawl mek dan chu mak an tih thu sawiin, “Tun hnai maiah pawh AMVCA-a kan member, Hnahlan, Thekpui leh Sialhawk VC te sorkarin nikum lama a lo thiahna thupek chu Court in hnawlin, an hna pangngai chhunzawm tir nghal turin sorkar hriattir nghal mah se, vawiin thleng hian sorkarin an hna a la chhunzawmtir duh ta chuang lo a ni,” a ti.
Heng zawng zawngte thlir hian, Mizoram sorkarin VC term dinglai pawt tawia inthlanna a neih luihpui tur chungchangah hian dan hnuaiah hnehna chang mah se, mipui thinlungah erawh hnehna an chang chuang lova a hriat thu a sawi bawk.