MPCC Media Department Chairman Lal Remruata Renthlei chuan an sawi anga an awm loh nasat avangin tun hnaiah ZPM-te lakah neutral an beidawng tan niin a sawi.
Nimina Aizawl Press Club-a thu thar thehdarhtute a kawmnaah Lal Remruata Renthlei chuan, Mizoram pumah Village Council leh Local Council inthlan a awm dawn a, tum tum inthlang tur hi sawi neuh neuh a tam hle a. Hriat theih chinah VC leh LC term pawh tawi hi Mizoramah a vawikhatna a ni a, sorkarin a chhan a sawi hi minister-te leh CM Adviser te sawi a inanglo vek a, mipui pawhin rin tur ber an hre lo tih a sawi.
Lal Remruata Renthlei chuan ZPM sorkar hian auhla ber ‘kalphung thar, mipui sorkar’ tih chu an theihnghilh ta nge, an auhla letling chiahin an kal chho ta zel a. Inrenchem an aupui a, chutih lai chuan sorkar ruangam an ti lian a, sorkarah hna an ruat belh teuh a, hlawh an tipung bawk a, inrenchem lam an hawi lo hle tih sawiin, “An inrenchem ve na chu mipui an hrek a, chhiah an tipung a, buhfai man an ti pung bawk a, heng te hi an inrenchem ve dan a ni,” tia sawiin, ZPM-te hian an thusawi an zuk a, an sawi loh angin an awm a, a bul ber chu ideology an nei lo a ni. Ideology mumal nei lo chu a kal thui theih loh tih a sawi.
MPCC thupuangtu chuan tun hnaiah Agriculture Minister thusawi lai video a darhah, ‘Opposition VC in thlan tlin chuan kei chu in MLA ka nih avangin min hmu ngam mai thei, mahse ka Minister pui te chu in hmu ngam dawn em ni?’ tia a sawite hian neutral te rilru a tina a, mipui sorkar an beseina te a bo mek niin a sawi.
ZPM mipui sorkar, hleihbik nei lo an intiam a, mipui sorkar din tum an tih sawiin Lal Remruata Renthlei chuan, “Tun VC leh LC inthlanah hian ZPM an chak emaw chak lo emaw mipui thlan te chu thawhpui thei tur an ni, chu chu democracy kalphung pawh a ni. Mipui sorkar, mi tin huap auhla-a nei ten party dang VC leh LC te thawhpui thei lo tura sawi hi a fuh lo va, khawtlangin anmahni enkawl tura tha bera an thlan te chu sorkar in a thawhpui mai tur a ni,” a ti.
ZPM sorkar atangin sum lengvak a tlem tial tial a, sumdawng tenau te, ni tin chawhmeh leh eichawp zuar leh inhlawhfa chawp te phei chuan an tuar nasa zual hle tih sawiin Lal Remruata Renthlei chuan, “Hengte hi kan sorkar hian tanpui ngaihna a hre lo va, an tuar tlawk tlawk mai a ni. Heng mite hian Congress sorkar kha an ngai em em a, khatih lai khan sum lengvak a tam a, mi tin khawsak pawh a ziaawm hle a ni,” tiin, tun hnaiah an intiam anga an awm thin loh avangin ZPM-te lakah neutral mipui an beidawng tan a, an party mi leh sa, unit hruaitute Zoram dungtluanah Congress-ah rawn lut nasa hle tih a sawi bawk.