Aizawl: BJP MLA Dr K Beichhua chuan ZPM sorkar chu BJP thawhpui an hreh avangin sum puk tur zawngin phi ruaiah a puh.
Thawhtanni khan BJP Mizoram chuan an pisa-ah chhung inkhawm an nei a. He huna thusawitu BJP State Core Group Member Dr K Beichhua, MLA, chuan chief minister Lalduhoma kaihhruai ZPM sorkar chu rethei leh harsa tak ni mah se, BJP thawhpui an hreh avangin sum puk tur zawngin an phi ruai tih sawiin, “Thla tin sum an puk ta tlauh tlauh mai a ni,” a ti.
Dr K Beichhua chuan, ZPM sorkar chu mipuia an inzawrhna leh an thutiam an tihlawhtling hlei thei lo tih sawiin, “ZPM sorkar kan hrawn mek hi fapa tlanbo dinhmun nente pawh an inang dawn viau mai a. Tunah hian min bel lovin tlan tlan mah sela, an tlanbona ah eitur an tla chham ang a, ei tur an hmuh loh hun engtikah emaw chuan inchhir hun an la neiin, an la rawn inlamlet ngei dawn a ni,” a ti bawk.
India-ah Congress party chu a zung a nget tawh a, that chhuah leh a har viau dawn avangin Mizoramah pawh Congress party hian awngrawp lam a pan tih sawiin Dr K Beichhua chuan, “Mizoramah Congress party chuan thu dik chanve pawh ni mang lo, dawt hmangin BJP an beih avangin kan la hniam deuh hlek a. Mahse, chutianga Congress party-ina min beih lai mek chuan tuna an dinhmun chu kan hmuchiang hle a, tun tum Delhi-a inthlan neihah pawh an dinhmun chu zero a ni,” tiin, Mizoramah Delhi aia an that hret chhan chu MLA pakhat an neih vang tih a sawi a. Delhi-ah a zawna term hnih sorkarna AAP-in an lak hnuah India ram khawpui ber Delhi-ah chuan hneh takin BJP chuan sorkarna an la thei a, mipuiin BJP-ah rinna an nghat nasa tih a lang chiang hle niin a sawi.