Kan ram hian hma sawn ve se, ram changkangte ang hian ram nuam zawk leh intodelhah inhlangkai ila tih hi mitin duh dan a ni a. Kan social media zawng zawng en pawh hian chu chu a lang chiang khawp mai. Hmasawn duhna hi khawvel mihring zawng zawngin kan nei vek, kan tlangau pui ber pawh a ni.
Hmasawn tura kawng dik erawh kan la zawh lo ni berin a lang a. Kan kalna kawng kual ngaiah kan la lêt kual vel mai mai niin a lang bawk. Harsatna/hmasawnna daltu hi kan la su pawp lova. Engemaw takin min la dai dang niin a lang a ni. Pawisa pawh kan phu tawkah hmasawnna tur hian kan hmu a. Mahse, kawng dika kal ta lo chuan a ni lo lamah kan khawhral zo leh thin a ni.
Kan ram hruaitute kan dem a. Mahse, hruaitu kan inthlakin a kawng ngai tho an zawh leh thin si. Kan ram hmasawnna tak tak tur hian politician ngaihdan/hriatdan ngawt hi a tawk loh chin a awm tih chu a lang chiang viau. Chuvangin a pawimawh berah chuan kan hruaitute hian ram kaihhruainaah anmahni ngaihdan leh rin dan ngawt a tawk lova. Mithiam kaihhruaina an mamawh a ni tih an hriat a pawimawh ta. Mahni fing bera inngai, mahni ngaihdan tha ti em em kan hruaitute hian engkim an hre vek lova, an thiam vek hek lo. Mi ram hmasawn tawhte hian eng angin nge hma an lo lak tawh thin, mithiamte thiamna engtinnge an lo hman tangkai thin tihte hi kan ram hruaitute hian zir uluk ngam sela. Hruaitu a kan thlan tawhte hi kan thlak mai dawn lova. A lo berah kum 5 chu min hruai dawn a ni tih hi hrechiangin chumi chhung chuan mithiamte hmalakna hmang tangkai thiam se ke kan pen ngei a rinawm.
Chief minister nihte, minister nihte hi a ropui em em laiin an han nih hian ram tan an fing ber thut chuang lova, ram hmasawnna thlen tura rilru siam a, an hriat lohte phawrh ngam a, mithiam zawk rawih nachang hria te hi mifing leh hruaitu tha an ni mai thin. Midang finna hmang tangkai thiam hi mifing ber berte chu an ni thin a. Naktuk maiah khawtlang hruaitu thar kan nei dawn a. Eng ang mi pawh min kaihruaitu an rawn ni thei. Ram hruaitu tha ni tur chuan khawtlang kaihruaitu atang hian mithiam kan hman tangkai theihte thurawn lak nachang hria se kan ram leh khawtlang hi a zuang dawrhin a rinawm.