Aizawl: MNF Sr Vice President Dr R Lalthangliana chuan local council leh village council inthlan hmachhawn turin an party chu an inpeih tawh tih sawiin, democracy venghim turin mipuiten taima taka vote thlak turin a sawm.
Nimina Aizawl Press Club-ah thu thar thehdarhtute a kawmnaah Dr R Lalthangliana chuan, LC leh VC inthlan lo awm turah an party chu an inpeih thlap tawh a. He inthlan atan hian candidate an ruat kawngah a hma zawng aiin an uluk a, inthlan tawh zawng zawng aiin an pal pawr pawr lo a. Pa ena an en, lar satliah lo, khawtlang dinhmun leh sorkar kalphung hria an thlang chhuak tih sawiin, “ZPM sorkarin a thuneihna mipuite a hman khum mekah hian mipuite duhthlanna lo lang chhuak tur chu nghakhlel takin kan thlir mek a ni,” a ti.
Inthlan lo awm turah sorkar hian vauna hrang hrang tihrik neiah puhin MNF Sr. Vice President chuan, “Vauna leh insawithaihna chi hrang hrang hmanga Minister rualte leh ruling MLA ten vote thlak tura mipuite an rum thaihna thawm hriat tur a tam lutuk hi a runthlak hle a. Democracy kalh tlat a ni,” tiin, mipui sorkar letling chiah, party bil sorkar sawhngheh tuma, khaw eng pawh zah lova ZPM sorkar hmalak mekna hi mipuite’n an vote hmanga an dodal a ngai tih a sawi.
Dr R Lalthangliana chuan sorkar awm chhan ber, mipuite zangkhaina leh remchanna siam sak lam aiin, sum leh paia hlawkna tur lam ringawt thlir chunga sorkar thuneihna an hman tak zel avangin kum khat leh thla hnih vel thuneihna an chan chhung lekin mipuite tawrhna a nasa tih sawiin, “Assembly rorelnaa awm rei ber zing a mi, term ruk (6) ka tling ve tawh a. Cabinet Minister-in kum 15 ka awm ve tawh a. Mahse, ka thlir let thin a, Mizoramah sorkar hetiang hi a vawi khat awmna a ni a. Inup khawm sorkar an ni. Engkim mai deuhthaw hi an sorkar hma khan thil ni thei lo tur chi hi an sawi huai mah mah a. Tunah an inpalbuai ta deuh niin a lang,” a ti.
MNF Sr. Vice President chuan kum 2025-26-ah pawh hian VC te tan Rural Local Body Grant Rs. vbc 74 ruahman a ni a. Khawpuia hman tur Urban Local Body Grant pawh Rs. vbc 40 ruahman sa a ni bawk a. Heng sumte hi Mizoram sorkarin a hrek theih hauh loh a. Ruling leh Opposition VC chungchangah hian tuna chief minister Lalduhoma leh ZPM President Lalliansawta ten ‘ruling VC nih avangin hamthat fal bikna tur a awm tawh lo; tia an sawi chu, heng thil hre chunga ngaihtuahna sengin, VC leh LC inthlanna lo awm turah hian ZPM sorkar laka democracy humhim tura huaisen taka vote thlak vek turin Zoram mipuite a ngen a ni.