- Dr. C. Lalrampana
A KAMKÊUNA
State pakhata civil force, dan bawhchhiatna ven leh hmuhchhuahna leh mipui thununa enkawlna kawnga mawhphurtute hi police an ni. An nihna dik tak hi misual mana, chhui zuitu leh thubuaì chingfeltu Official force an ni. An hna chu mipui thupek vawng reng tur, dan bawhchhiatna hmachhawn tur leh miten dan an zawm tur, a nih loh leh dan bawhchhetu mana roreltute hmaa hruaitu tur an ni. Tin, ani chuan an hnenah, “Mi zui rawh u, tichuan, mihring mantuah ka siam ang che u,” a ti a. tih thu bible-ah kan hmu (Mat 4:19). Isua’n mihring mantu tura a koh Petera-te leh police-te hi mihring mantu ve ve mah se, an hna thawh dan erawh a inang lo deuh. Police-te hian misual, dan bawhchhia, tual that, rukhmang leh suamhmang, pawngsual ching leh awmtha duh lote man chhuah leh an sulhnu chhui hna an thawk a. An mante chu police custody-a dah an nih hnuah thiamloh an chan chuan an thil tihsual phu tawk ang zelin tan inah an dah thin. Petera leh Missionary-te mihring man ve erawh chuan ring lo mite leh misual leh dan bawhchhia apiang manin chhandamnaah an hruai lut thin. An fel chhoh viau phei chuan Isua tan in kalvari Central Jail-ah tang hlenin chatuan nunna chang turin an damchhung hun an hmang mai thin. Police-te hi an fimkhur hle loh chuan anmahni ngei pawh an inchaih awk thei a, thubuai rip tak an awrh let ve thei. Misual man chhuah leh sulhnu chhui kawngah police-te hi an fimkhur hle loh chuan mimal nun leh sawrkar thleng pawhin nghawng tha lo tam tak a nei thei a ni.
MRP-TE HI TUTE NGE?
Home Ministry, Government of Mizoram hnuaiah Mizoram Police (MRP) hi awmin January 21st. 1972 khan din tan a ni a, a general nature chu Local civilian police a ni a; an Headquarters
(PHQ) chu Khatla, Aizawl, Mizoram a ni. A tirah chuan mi 200 vel lek an ni a; tunah chuan Police District 11, Sub-Divisions 18, Police Stations 40, Special Police Stations 3 leh Police Outposts 13 lai an nei tawh. Silai keng chi, Armed Battalions 8-(3 MAP Bns. & 5 IR Bns.) an nei a; Border Outposts 23 an nei bawk. Hei bãkah hian, police unit 6 an la nei cheu bawk. Police sanctioned posts hi a vaiin 12,206 an nei mek a, a taka thawk mêk 8,634 awmin post hnawh khah loh 3,572 a awm bawk. Anni hi kan ram tan an pawimawha post ruak zawng zawng hi kan sorkar hian han hnawh khat thlap thei se a van duhawm tehlul êm!
Mizoram police-te hi an taimain an thawk rim em em a; sawisel bo ni bik lo mah se, India ram state danga Local civilian police-te nena khaikhin pawhin misual hnu chhui kawngah leh an service kawng hrang hrangah an fakawmin entawn tlak tak an la niin a lang. Chuvangin, Zoram mipui pawh hian kan chawimawi thiama kan puihbawm that a pawimawh hle.Tlin tâwk lohna lai erawh an ngah ve tho va, mahse, state danga Police te ai chuan hlemhletna kawng hrang hrangah pawh ringtu kan nihna hian a phuar tha thawkhat tih a hriat theih. Anni pawh hian he rinawmna spirit hi vawng nung reng thei se alawmawm ngawt ang.
CHAWIMAWINA SANG AN DAWNG
Mizoram police-te chuan Republic Day 2025-a Ministry of Home Affairs (MHA)-in Police medal dawngtu officer a thlante chungah tihtakzetin lawmthu an sawi a. Chung lawmman dawngtute chu:
1). Pu Zosangliana, MPS, Secretary to Government of Mizoram – President’s Police Medal for Distinguished Service,
2). Pu David Lalthangliana Hmar, MPS, Sr.
Superintendent of Police, Kolasib District – Police Medal for Meritorious Service,
3). Pu Joseph Lalremmawia MPS, Assistant
Commandant & OSD to Chief Secretary – Police Medal for Meritorious Service,
4). Pu Zoramsanga, Inspector of Police, Mamit DEF – Police Medal for Meritorious Service.-te an ni.
Kan Zoram Police Officer-te’n hlawhtlinna ropui tak an dawng hi an entawn tlakin an chhuanawm takzet a ni. Heng kan Police-te hi an lawmpuiawm takzet a, hetiang hna thawk tha leh mi entawntlak kan nei hi Mizoram mipuite tan chuan an chhuanawmin chawimawi tlak an va ni tehlul êm! kan ngaihlu hle tur a ni. An chhungkua leh laina hnaite zawng zawng pawh kan lawmpui takzet bawk tur a ni.
Mizoram Police-te chuan-”Heng kan thawhpuite hi kan lawmpui takzet a, hetiang hna thawk tha leh mi entawntlak kan nei hi Mizoram Police chuan kan chhuangin an chawimawina dawn hi kan ngaihlu takzet a ni. An chhungkua leh laina hnaite zawng zawng pawh kan lawmpui tak zet bawk a ni.” tiin thuchhuah an siam. An inchawimawi thiam hle mai. Hetiang hi kan nun dan tur dik tak a ni.
A TLÃNGKAWMNA
Republic Day-ah hian India sawrkar hian Padma Awards, Param Vir Chakra, Maha Vir Chakra, Vir Chakra, leh Pradhan Mantri Rashtriya Bal Puraskar etc.-te chu a hlan thin a. Chutiang zelin Independence day-ah Ashoka Chakra, Kirti Chakra, & Shaurya Chakra. Eligibility Defence personnel, Police forces, Central Armed Police Forces, Railway Protection Force, & Civilian citizens etc-te a sem thin. Hetiang chawimawina, lawmman hlu tak tak kan Police chhuanawm tak takte’n an dawng thin hi an lawmpuiawm takzet a, chutiang zelin zirtirtute leh khawtlang leh ram tana thawk thaten lawmman hlu tak tak an dawn thinte pawh hi inlawmpui thiam a pawimawhin kan chawimawi thiam a tha hle. Kan Pathian thuah chuan “Lawmte chu lawmpui ula, tapte chu tahpui rawh u.” tih a ni a. Mizote hian dinhmun thaa ding leh vanneihna dawngte hi kan inlawmpui thiam tawk thin lo. Tapte erawh kan tahpui mai thei a, thinlung taka tawrhpuina tak tak erawh kan nei nep sawt hle. A langa inlawmpui, thinlung taka inlawmpuina tak tak nei si lo; a langa intawrhpui êm êma lang, thinlung taka tawrhpuina nei silote hi kan tam hmel viau lo maw? Kan Police fel tak tak, chawimawina dawng tlak ngawih ngawihte’n hetiang chawimawna sang leh chhuanawm an han dawng thei hi chawimawi ila, Pathian hnenah lawmthu sawipui theuh teh ang u. Keinin kan lawmpuia kan chawimawi loh chuan state danga mite’n an rawn chawimawi dawn si lo.