- Laiu Fachhai
Tirhkoh Paula chuan, “Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tunah tisaa ka nung hi rinnaa nung ka ni – Pathian Fapa, mi hmangaiha ka aia inpetu rinnaah chuan” tiin Kristian leh tirhkoh a nih hnuah chuan hmana a nun pangai anga nung tawh lovin, amaha nung tawh Krista chuan a ngaihtuahna te, a thusawi te, a nun leh a thiltih te thununin amah Krista anna lamah a hruai tawh zawk thinzia testimomy ropui tak a sawi a ni (Galatia 2.20). A tawi zawngin sawi ila, Tirhkoh Paula khan tunge a nih tih a theihnghilh ngai lo; a nihna hre rengin hmun tin, hun tin leh a thiltihna apiangah Kristian leh tirhkoh a nihna nena inmawia awm a tum tlat a ni.
Keini pawh hi Tirhkoh Paula chuan, “A kohna che u phua awm tûrin kei, Lalpa avânga tâng hian ka ngên a che u” tiin min fuih a (Eph. 4.1), amah anga Krista zuitu leh Krista rawngbawltu ni tura koh kan nihna nena inphua awm tûrin min ngen chiam a ni. A awmzia chu Kristian kan nihna te, Kohhran upa ka nihna te, Pastor ka nihna te, Missionary kan nihna leh thuhriltu, etc kan nihna te hi hmun tin, hun tin leh kan thiltihna apiangah hre renga, kan nihna nena inphua awm zel tûrin mawhphurhna kan nei a, chu kan mawhphurhna chu hlen tura ngen kan ni. Heta “ngen” tih hi puitling tawngkam a ni a, hlen ngei tura beisei a ni.
He thu ziaktu hian hmun tin, hun tin leh ka thiltihna apiangah Kristian leh Pastor ka nihna theihnghilh loh ka tum thin a. Chumi kawng ka zawhnaah chuan thil ropui ni lem lo ka testimomy tlemte han sawi ve ila chhiartute ngaih loh lam a ni lovang chu maw. Motor khalha accident lian tham lo ka tawh changte hian a thiam zawk ka nih pawhin tunge ka nih tih hriain Lal Isua hmingin ka ngaidam hlawm thin a, nakin zelah erawh chuan fimkhur tawh turin ka chah tel hlawm thin. Ka motor repair man pawh keimahin ka chawi mai thin a, kan nuin “I ngaihdamnate hi kan chhungkaw tan a man a to thin mang e,” tiin fiamthu titakin min fiam thin. Ka nihna hre renga tangka sum ngainat loh ka tum a, sumah rinawma inphal ka tum a ni. Ka mawhphurhnate a hun taka hlen ka tum a, ka hlen theih loh turah chuan mawhphurhna lak loh ka thlang zawk thin. Zuk leh hmuam tih loh ka thlang a, thusawiah fimkhur ka tum a, office, committee, seminar leh social media-ah te emotional (thinrim) loh ka tum a, thenawm khawvengte nen inngeih taka lenho ka duh a ni.
Chutianga ka nihna hriat reng ka tum chung pawhin a chang erawh chuan ka nihna theihnghilhin ka nihna nena inphua ka awm theih loh chang a awm thin. Vawikhat chu Maruti Eeco Van khalhin Siaha atangin Aizawl lam kan pan a. Tawipui kan pelh hnu niin ka hria, Lunglei lam atanga rawn kal Assam Rifle truck lianpui nen kan intawk a. Kawng sir lam deuhah dingin ka kian a. Ani pawh side rawn la vein a rawn kal a. Mahse kawng lai lama a rawn tlan luh hma deuh avangin a truck hnunglamin kan motor (van) hnunglam kawngkhar lo hrutin kan van chu hnungtawlh zawngin feet eng emaw zat a hnawl a, van hnunglam kawngkhar chu a tichhe vek ta a ni. Truck erawh chu eng tin mah a awm lo. Hindi ka thiam loh avangin ka motor chuang ve kan naute nen an inhnial ta a, a tirah chuan keima thiam loh angin min puh a, mahse kan nauten a nihna dik tak an sawi hnuah chuan ama thiam loh a nihzia a pawm thei ta a. A repair man zat tur hisapin sing nga chawi turin kan ti ta a.
Ngaihdam min dil a. Mahse ka ngaidam duh lo. An hotupa Major-in ngaihdam a dilpui hnuah pawh ka ngaidam thei chuang lo. Repairna atana sum sen tur a tamzia ngaihtuahnain ka nihna min theihnghilhtir ta a ni. A tawpah chuan titauin, “Cheng khat mah min pe suh u” ka ti a. Major-in, “Driver hi contract-a rawih a ni a, sipai dan ang chuan a chawitu tur ber chu accident tawktu, hlawh tlemte nei driver hi a ni a, khawngaih la, repairnaa i chawi tur tlem azawng tala a tihzangkhai zawk nan sing khat leh sang nga hi pawm sak hram rawh,” a tih leh avangin sing khat leh sang nga chu ka la ta a. Aizawlah ka repair-tir a, motor hnunglam kawng khar chu a thar hlaka thlak a ngaih avangin Guwahati lamah an chah a, repair man leh senso dangte nen sing li aia tam ka seng a ni.
Motor khalh lai, inkhelh lai, inthlan campaign lai leh sum chunga thuneihna neih lai te hi Kristian tha nih a harsa ber thin awm e. Chutiang chu a nih pawhin Kristiante, a bik takin rawngbawltute chuan chhuanlam kan nei tur a ni lo. Kha accident ka tawhna hmun leh hunah khan Kristian leh Pastor ka nihna hriain, “Dik lo zawk chu nangmahni in ni a, mahse khua leh tuite kan himna tura in nunna dahkhama min vengtute in ni a, chuvangin kan Lalpa Isua Krista hmingin ka ngaidam a che u,” lo ti thei ta ila chuan, tunge sawi thei, driver leh sipai ho zingah khan Lal Isua hre duh leh zui duh te an awm thei asin. Mahse Lal Isua thatna lantira, nuna Chanchin Tha hrilna chance ka liamtir ta a ni. Ka ngaihtuah letin khatih laia ka awm dan, ka thusawi dan leh pawisa ka chawitir dan te khan ka thlarau nun a tilawm lo hle. An batallion Hqrs lama kala pawisa pek let leh ka duh a, mahse hun remchang ka nei thei ta lo a, ka pe let tawh chuang lo. Ka inchhir hle a, Pathian hnenah ngaihdam ka dil a, ka nihna hre reng tura min puih turin ka tawngtai a ni.
Nimahsela hun a liam a, ka nihna ka theihnghilh chang a awm leh thin. Khawpui thenkhatah (Mizoram khawpui a tel lo) taxi leh rickshaw hire man ka rin aia tam min dil nia ka hriat changte hian driverte nen inhnialin ka aw ki a san chang a awm thin a. Office, committee, seminar leh social mediaah te emotional (thinrim) chang ka nei thin a, hmun dang, hun dang leh thiltihna dangah te pawh ka nihna theihnghilhin Kristian leh Pastor ang lo taka thu ka sawi chang leh thil ka tih chang a awm thin. Khang sipai motor driver leh sipai te, taxi leh rickshaw driver te, office, committee leh seminara ka thinrim hmuhtute leh social mediaa ka emotional thuziak chhiartute kha Pathian nia ka thusawina Biak inah lo inkhawm ve ta sela, ka thusawite an ei thei ang em, tih te ka ngaihtuah let leh a, ka inchhir vawng vawng thin.
Ni e, Kristiante leh Lalpa Krista rawngbawltute chu hmun tin, hun tin leh kan thiltihna apiagah kan nihna hre reng thin tur kan ni a, chutianga tih chu kan mawhphurhna a ni. Nimahsela khawvela awm kan nih rih avang hian a chang chuan tunge kan nih tih kan theihnghilh leh thin. A pawi hle. Hawh u, kan nihna theihnghilh tawh lova, kan nihna nena inphua awm thei turin Pathian hnenah inhlan thar lehin a puihna i dil ang u.
Chutichuan politiciante’n inthlan hun leh hruaitu an nih hunah te, an office, session hall leh an zinna tea an awm dan, an chetzia leh thusawinaah te Kristian (thenkhat phei chu kohhran upa) an nihna te hre rengin eiruknaa inhnamhnawih loin dawt leh tawngkam mawi lote sawi lo sela, thinrimin mite an khum lo bawk sela; contractorte’n an contract hnathawhnaah te Kristian an nihna hre renga hlep uchuak tur chauh ngaihtuah loin hna tha leh tlote thawk thin sela; sawrkar hnathawk Kristiante’n an nihna hre rengin mipui (sawrkar) sum, hun leh an thuneihnate hmang khawlo lovin dikna leh thawhrimnaa hna thawkin an mawhphurhna hlen sela; Pastor, Kohhran upa, missionary leh thuhriltute’n thusawiah te, chêtziaah te, hmangaihnaah te, rinnaah te, thianghlimnaah te ringtute entawn tlâkin awm ila (1 Timothea 4.12); mipuite pawhin hmun tin, hun tin leh thiltihna apiangah Kristian an nihna hre rengin an nihna nena phua dikna, rinawmna leh thawhrimna nun neih hlawm sela, chutichuan Kristiante’n majority kan nihna kan state hi Pathian malsawmna dawng tlak state kan nihtir thei ang a, India leh khawvela ram tha ber leh duhawm ber ni turin kan siam thei ang. Chanchin Tha hrilnaa thiltithei tak, nuna Chanchin Tha hriltute kan ni nghal bawk dawn a ni.
In taksa hi, ‘in chhûnga awm Pathian hnên atanga in hmuh Thlarau Thianghlim chênna in a ni tih in hre na nge? Mahni ta pawh in ni tawh hlei nêm, mana lei in ni tawh asin; chuvângin, in taksa hian Pathian chawimawi rawh u (1 Corinth 6.19-20).