ZPM Media & Publicity Department General Secretary, TBC Lalthanmawia chuan nimin khan Aizawl Press Club-ah thu thar thehdarhtute kawmin ZPM party chu Mizorama politics harhtharna thlentu, mipui beisei leh innghahna party awmchhun a nih angin local/village council inthlanah pawh mipuiten hnenah sang tak an pek an beisei thu a sawi.
TBC Lalthanmawia chuan kum 37 zet duhsak taka mipuiten ram rorelna an chelh tir thin party-te laka mipui beisei a bo tak em avang leh an tih theih zawng chu tizo tawha mipuiten an ngaih avangin, ZPM party chu mipui beisei leh innghahna party awm chhun a lo ni ta tih a sawi.
Chief Minister Lalduhoma kaihhruai kalphung thar mipui sorkar chuan ram rorelna a chelh tirh atangin beihna leh sawichhiatna karah, tha thlah lovin ram hmasawnna hna tam tak kum khat lek chhung pawhin a thawk tawh a, hmachhawp leh hna kal lai mek pawh thahnem tak a awm mek tih sawiin, TBC Lalthanmawia chuan, “Hetiang taka thil tha tih duh ministry hian sorkar hnathawkte thawhpuina a dawn that em avangin hmalakna pawh a kal chak viau a ni,” a ti.
Kalphung thar, mipui sorkar hian hna thawk mah sela, eptu party-te mit hi an tlung dawn chuangin lang lo mah se, an rawngbawl sak mipuite an lungawi a, tun hun atana thlangtu Pathian an chunga a lawm chuan a tawk viau tih a sawi a. Sorkar hmasate hun laia thil thleng mak tak takte hi mipuite hian an theihnghilh lo va, hun tha an neih chhunga ram an kaihhruai danah mipuiten an duhkhawp tawh lo a, an hnawl tawh a ni tih inhre thar turin eptu party te a chah.
LC/VC te hi sorkar kutke pawimawh tak leh mipui nena inngheng tlat an ni tih sawiin TBC Lalthanmawia chuan, “Veng chhung hmasawnna leh khawltang mipuite hmasawnna hi LC/VC te kutah a innghat thui hle a ni. LC/VC nei tha veng/khua chu khaw dang leh veng dang aiin hma an sawn thin a, chutih laiin LC/VC tha neih lohna hmunah chuan sorkar hmalaknaten mipui hnen a thleng tha duh lo khawp maia, veng chhung hmasawnna a thuanawp thin a ni,” tiin state sorkar leh LC/VC ten thawhhona tha tak an neih a pawimawh a, inkhawp rem tak leh state sorkar policy tuipui tur leh phur taka sorkar hmalakna mahni veng theuha kalpui thei tur village council member thlan chhuah a pawimawh hle dawn niin a sawi bawk.