Aizawl: Excise Minister Lalnghinglova Hmar chuan zu in lo thei lote dinhmun hi huaisen taka ngaihtuah ngam a tul tawh nia a lan thu a sawi.
Nimina ZPM party pisa-ah chhung inkhawmah thu sawiin Excise Minister chuan, “Politician ang ni lovin mi mal rilru in sawi ta i la. Zu in lo thei lote in tur zu chhe lutuk hian ngaihtuahna thar min pe teh se. Tun hnaiah Mizoramah zu in mi an thi nasa hle mai, a in lo thei lote dinhmun hi huaisen taka ngaihtuah ngam a tul tawh niin a lang,” a ti.
Excise Minister chuan sorkarin zu leh ruihhlo lakah beihpui an thlak zel bawk tih sawiin, “Vaivakawna ‘a senchi lane’ tih chu ‘venbuk lane’ tia thlakin khawtlang nen tang ruala zu hmunpui tihrem a ni tawh a ni a, hei hian sorkar hmalakna thawhpuiho thei khawtlang hruaitu neih pawimawhzia a ti langin ka hria a,” tiin, village council leh local council inthlanah pawh sorkar nena hmasawnna bawm zawn ho thei tur mipuite’n vote turin a sawm.
Mizoramah kalphung thar a takin an hmu mek a, chu kal phung lo thar mek chuan Mizoram tha zawk a thlen ngei dawn tih sawiin Lalnghinglova Hmar chuan, “Kan rama thil nihphung pangngaia kan lo neih tawh, dan kalh tih pawh kan hriat mang loh aikal lakte kan titawp ngam a, hei hian chhungkaw thenkhat tan nghawng nei deuh mah se, dan anga kala siam that hna thawh phawt mai hi kan hotuten tha an ti a, kalphung tharin kan kal mek a ni,” a ti.