Guatemala City dai kawr thuk leh bawlhhlawh takah bus a tlan lut a, mi 51 vel thiin mi dang hliam eng emaw zatin hliam an tuar bawk niin Guatemalan thuneituten an sawi.
Fires services thupuangtu, Mynor Ruano chuan bus tla lut chhunga ‘tangte chhan chhuah tumin’ an bei mek tih Thawhtanni khan a sawi a. Mipa 36 leh hmeichhe 15 ruang chu an provincial morgue-ah dah luh an ni tawh tih a sawi bawk.
Bus hi Guatemala khawpui luh leh chhuahna kawngpui lun taka tlan niin kawr thuk tak kân nana lei dawh, Puente Belice an tih atangin a tla a ni.
Fire department-in social media-a thlalak an thehdarhah chuan chhanchhuah hna thawktuten kawr bawlhhlawh tak atanga mi an la chhuak lai a lang a. A lan dan chuan bus hi a thal a ni.
Guatemala President Bernardo Arevalo chuan thite chu ni thum chhung sun tur an nih thu a puang a, sipai leh disaster agency mite tirh nghal an ni tih a sawi bawk.
“Tukina thu lungchhiatthlak tak hriaa tho chhiat tawk chhungte ka hre reng a, an natna hi ka natna a ni,” a ti.
Guatemala City Mayor Ricardo Quinonez pawhin social media-ah emergency services-te tirh nghal an nih thu leh traffic police-in helai kawnga hna thawh hi a buai loh nan tlan dan an tidanglam nghal bawk tih a sawi.
National Civil Police pawhin mi zawn leh chhanchhuah hna hi an puih thu leh ‘a theih ang apianga an puih’ tur thu an sawi ve bawk.