Autonomous District Council (ADC) pathum huam chhung district pahnih tih loh, Mizoram district pakuaa village council leh local council inthlanpui vawiin hian neih a ni dawn.
Mizoram hmun hrang hranga village council leh Aizawl leh Lunglei-a local council inthlan hi zing dar 7 atanga vote thlak tanin, tlai dar 4 thleng vote thlak hun hawn a ni dawn a. Zanin vek, zan dar 7 atangin vote chhiar a ni nghal dawn a, polling station tina RO-ten result an puang dawn a ni.
The Zozam Times zawhna chhangin Mizoram State Election Commissioner Dr H Lalthlangliana chuan village council leh local council inthlanna neih turah hian harsatna leh buaina an neih lem loh thu a sawi a. Vawiin (nimin) khan hmun hrang hranga he inthlannaa duty tur polling party-te pawhin harsatna awm lovin an duty-na hmun tur an pan fel thu a sawi.
Dr H Lalthlangliana sawi danin Aizawl district chhunga Lawipui Veng Local Council inthlan hun chu Congress candidate pakhat a boral avangin inthlan ni tura hun ruat pangngai cancel vek a ni a, re-poll atan February 14, 2025-ah ruat a ni a. Hei bakah, Lunglei district-a Lungsen Block chhunga Lalnutui khuaah candidate pakhat a boral avangin inthlan hun atan February 13, 2025-ah sawn a ni bawk.
He inthlanna neih turah hian deputy commissioner pakuate chu District Election Officer atan ruat an ni a, district tina additional deputy commissioner-te pawh Assistant District Election Officer atan ruat an ni.
Inthlanna buaipuitu atan hian a tul angin sorkar hnathawkte chu ruat an ni a. Returning officer, presiding officer leh polling officer atan pawh a theih chin chinah khaw chhung mi ruat an ni.
Election observer atana ruatte chuan inthlan chungchanga hma lak dan an vil dawn a. Inthlan kalpui dana lungawi lohna neite chuan observer-te an hriattir tur a ni.
Vote thlaktuten an thlakna mi dangin an rin hriat mai theih lohna tur te, inthlanna thianghlim leh felfai neih theihna tur tein ballot paper – general seat leh reserved seat-te ballot box pakhatah thlak vek tur a ni a. Ballot paper hi general seat tan pakhat (a var/white) leh reserved seat tan pakhat (a senno/pink) a rawng inang lo hman a ni ang a, a pahnih chuan ballot box pakhatah thlak kawp tur a ni.
Vote thlaktuten awlsam leh hun khawh ral lo zawka vote an thlak theih nan voter tamna deuhah chuan polling booth leh voting compartment pakhat aia tam ruahman a ni a. Party worker-te inkara boruak tha lo pumpelh nan polling station bulah political party-te leh candidate-te awm khawm nan Common Election Camp pakhat chauh siam phal a ni bawk.
Tun tum VC leh LC inthlan neih turah hian VC 544, awmah seat 2,416 a awm a, village council hnuaiah hian hmeichhe seat reserve 613 a awm a ni.
Aizawl Municipal Corporation leh Lunglei Municipal Council hnuaia LC 111 awmah seat 723 a awm a, a pum puiah vote nei mi 4,39,409 an awm a. Local council hnuaiah hmeichhe seat 195 a awm bawk.
AMC huam chhungah kumin January thla khan local council thar pahnih – Bawngkawn West leh Tlangnuam West-te pian belh lehin tun tum Local council inthlanpuiah hian local council 87 a awm dawn ta a ni.
Duty turte mamawh pechhuak
Vawiina village council/local council inthlna Aizawl district chhunga duty tur polling party-te hnenah ballot box, ballot paper leh hmanraw dangte chu nimin khan dispatch centre hrang hrang atangin pekchhuah a ni a. Polling party-ten an inchin fel zawhah an duty-na hmun tur theuh an pan nghal.
Aizawl local council leh BDO Tlangnuam huam chhung VC inthlanna hmanraw hrang hrangte chu AMC Sports Complex, Bawngkawn atangin PRO leh RO te hnenah hlan a ni a. Hemi rual hian BDO Office Darlawn, BDO Office Thingsulthliah leh BDO Office Aibawk te atangin an huam chhunga VC inthlanna neih tura hmanrua theuhte pekchhuah a ni bawk.