Zaithiam a ni a, huhang a ngahin, a kalna apiangah amah ngaisangtu leh ngainatute bawr a hlawh hle. Hun awl a nei meuh lo nachungin a hunawlah chuan Dua Lipa hian lehkhabu a chhiar thin.
Tun hnaia a interview-na pakhatah Dua Lipa chuan thlatin a lehkhabu chhiar tur a thlan fel thin thu sawiin, chu chu a hunawl neih apianga a chhiar mai thin thu a sawi a, literature chu khawvel a chen vena pakhat leh nuam a tih tak a nih thu a sawi.
Dua Lipa hian thawnthu mai bakah mi tam takin an chanchin an ziah thinnate chu a ngainat thu leh a nun chawmtu a nih thu a sawi lang tel bawk.
Kum 2023 June thla bik atanga a lehkhabu chhiar a sawichhuahte hi kumin February thla thleng hian an hawi zawng a inang lo hlawmin, thla tin lehkhabu pakhat a la chhiar chhuah deuh ziah bakah, a ziaktu ngainat zual bik a neihte phei chu an lehkhabu dang pawh a zawn zui nghal zel thu tarlan a ni.