Liverpool manager Arne Slot chuan Plymouth Argyle laka an tlawmna chu ‘pawm theih loh’ a nih thu leh Nilaini zana Everton nen Merseyside derby an khelh turah an thawhleh nghal tur thu a sawi.
A khelhtir ngun deuh tam tak awltir chungin Reds hian Pathianni zan khan FA Cup-ah Championship-a a mawngphaha awm, Plymouth hi 1-0-in an hneh lo.
An hmelma kumhlun, Everton hmachhawn turin Premier League lamah an thawk chhuak leh nghal dawn a, an chak chuan point kuaa hma an hruaina an tipung thei dawn a. Tun hi Goodison Park-a Merseyside derby an khelh hnuhnung ber a nih hmel bawk.
“FA Cup 3rd round-ah Accrington Stanley kan hneh a, Plymouth lakah kan tlawm zui a, pawmzam chi a ni lo. Team ang pawhin, min tantute ka ngaihtuah tel bawkin, a pawi tak zet a ni,” a ti.
“Nilaini zanah hi chuan keimahnia a dang daih kan lantir dawn a, a chhan chu kan inkhel result piah lamah kan khelh dan kha Liverpool khelh dan lo tak a ni,” tiin Slot chuan a sawi bawk.
Everton khelmuala an inkhel tur hi Slot-a tan Reds boss ni chunga Merseyside derby a khelh hmasak ber a ni dawn a, Goodison Park-a a hnuhnung ber a nih dawn thung a. Everton hi season lehah hi chuan stadium tharah an insuan lut tawh dawn a ni.
An inkhel tur hi December 7-a mi tawh tur kha a ni a; mahse, Storm Darragh avangin mipui him zawk nan sawn a ni a. Everton pawh hian Inrinni zan khan FA Cup-ah Bournemouth an hneh lo va, January-a Sean Dyche thlaktu, manager David Moyes-a kaihhruaia league-a an inlan hnuhnungah an chak vek.
Slot hian ‘boruak danglam tak’ a awm ngei a rinawm thu a sawi a; mahse, chumi hmachhawn thei turin a player-te pawhin ‘thluak fim tak leh ke tha takin’ khelh an duh tih a sawi.
“Tun hi heng player-te hian hetiang boruaka an inkhelh vawi khatna tur a ni lo,” tiin Slot chuan a sawi a. Right-back Trent Alexander-Arnold pawh a hliam damin a inlan thei dawn tih a sawi tel bawk.
“Engnge an tih turah an insawrbing theih ka beisei a, tactical lamah chauh ni lovin, hun hrehawmah pawh an ding thei ang. Plymouth kan khelhah khan inchuh rang tak te, na taka innawrte ka hmu a, kha kha an player-te thatna a ni a; mahse, khelmualah kan theihna kan lantir dawn a ni,” a ti.