Aizawl: Chief Minister Lalduhoma chuan Local Council leh Village Council term pawh tawiin tun tum inthlanah ZPM-in an thatpui leh chhiatpuina chhan tur engmah a neih a rin loh thu a sawi.
Nimin chawhma lam khan chief minister Lalduhoma leh a nupui, Liansailovi te chuan Chawlhhmun Polling Station-ah vote an thlak a. Polling station hrang hranga duty zawng zawngte, vote chhiara duty te, venhimna hna thawktute chungah lawmthu a sawi a. Khua leh tui tha an nihzia tilanga vote thlaktu zawng zawngte chungah lawmthu a sawi bawk.
Vote a thlak zawha thu thar thehdarhtu thenkhatin an kawmnaah chief minister chuan local/village council term pawhtawi hi an party chuan thatpuina chhan tur leh chhiatpuina tur chhan a neih a hriat loh thu a sawi.
Chief Minister Lalduhoma chuan tuna inthlan dan ruahmanna chu fel thawkhat viau nia a ngaih thu a sawiin, “A hun hi a chep deuh hlek a; mahse, election commission leh printing lamte an tang a, an inpeih hman tho avangin a tha thawkhatin ka hria,” a ti.
Tun tum inthlanah ZPM-in hnehna an chan a rin leh rin loh thu zawhna chu chief minister chuan, “Ring ve e a,” tiin a chhang bawk.