Aizawl: Lai Autonomous District Council (LADC) Chief Executive Member C Lalmuanthanga’n nimin khan Mizoram larsap hnenah bânna a theh luh avangin a kaihhruai, Congress leh MNF party intawm sorkar a tlu.
Member 25 awmna LADC-ah tun hnai khan ZPM MDC leh anmahni thlawptu member pahnih nen, member 13 neiin CEM C Lalmuanthanga kaihhruai sorkar ding laiin thlawptu a ngah tawk loh thu leh sorkar siam thei an nih thu larsap hnenah an thlen kal zelah, nimin chawhma dar 10:30 khan LADC Emergency Session-a floor test neih tur ni mah se CEM hian larsap kaltlanga bânna a theh luh avangin session-ah chairman, VL Hmuaka chuan CEM-in bânna a theh luh thu house-ah puangin, sorkar dinglai a tluk thu a sawi a. Floor test neih ngai a nih tak loh avangin session a titawp zui a ni.
Kum 2020-a LADC inthlanpui neihah MNF Legislature Party chuan Manghmunga Chinzah kaihhruaina hnuaiah sorkarna an siam a, December 14, 2020 khan Manghmunga Chinzah chu CEM atan lak luh a ni.
August 27, 2021 khan MNF Legislature Party atang thovin V. Zirsanga chuan CEM thutthleng a luah ve leh a, March 7, 2024 thleng CEM niin, sorkar kal mumal thei lovin eng emaw chen a awm hnuah Congress leh MNF ten sorkar intawm siamin May 7, 2024 atangin C. Lalmuanthanga chu CEM a ni ve leh a. Dan pangngai ang chuan kumin tawp lamah LADC inthlanpui neih tur a ni.
Hetihlai hian United Legislature Party atanga ZPM thlawptu, elected member pahnih – V. Zirsanga leh Lallawmsanga Apetow-te chuan MNF party atanga bânna Thawhlehni khan an theh lut a ni.
ZPM Legislature Party hian an hruaitu atan Leader-ah V. Zirsanga, Dy Leader-ah Manghmuga Chinzah, Secretary LR Dingliana Chinzah, Treasurer-ah BN Thangpuia te an thlang.